እዚ ዓወት’ዚ ድማ ነቶም ሕጹያት ተወዳደርቲ ከካብ ፓርቲኦም ተወከልቲ ኮይኖም ንክምረጹ ዓቢ ስጉምቲ’ዩ።
ኣብዛ ዝዓበየት መዓልቲ ኣብ ዘመተ ምርጫ ንፕረዝደንት ኣሜሪካ ዓመተ 2016፡ ሕጹይ ተወዳዳሪ ፓርቲ ሪፖብሊካን ዶናልድ ትራፕ ኣብ ዝበዝሐ ክፍለ-ግዝኣታት ብምዕዋትን ዝበዝሐ ድምጺ ተወከልቲ ብምርኻብ ተዓዊቶም ኣለዉ።
‘ ሽሕ’ዃ ሰባት ክኣምንዎ እንተተጸገሙ ኣነ ንሓድነት ዝሰርሕ ሰብ’የ። እመኑኒ፡ ንሓድነት’የ ዝሰርሕ። ነዚ ጀሚርናዮ ዘለና ንወድእ እሞ፡ አንጻር ሓንቲ ሰብ’የ ክለዓል ንሳ ድማ ሂላሪ ክሊንተን’ያ’ይብሉ ዶናልድ ትራፕ።
ሰነተር ቴድ ክሩዝ ኣብ ክፍለ-ግዝኣቶም ዝኾነት ቴክሳስን ጎረቤታ ኦኮልሃማን አላስካን ዝተዓወቱ ክኾኑ ከለዉ ንዶናልድ ትራፕ ክስዕሩ ዝክእሉ ምኳኖም ብምግላጽ ንመወዳድርቶም ካብቲ ውድድር ክእለዩ ተማሕጺኖም።
ብኻልእ ወገን ካብ ፓርቲ ዲሞክራትስ ሂላሪ ክሊንተን ኣብ ደቡባዊ ክፍለ-ግዝኣታት ዓቢ ዓወት ዝተጎናጸፋ ክኾና ከለዋ ገለ ካብቲ ትኩረት ዘመተአን’ውን ናብ ፓርቲ ሪፖብሊካን ዝተኾረ ይመስል።
ተቐናቓኒአን ዝኾኑ ሰነተር በርኒ ሳንደርስ ድማ አብ ኣርባዕተ ክፍለ-ግዝኣታት ማለት ቨርሞንት፡ ኦክልሃማ፡ ኮሎራዶን ሚነሶታን ዝተዓወቱ ክኾኑ ከለው ዝያዳ ንምዕዋት’ውን ይመባጽዑ።
ይኹን ደአ እንበር ክልቲኦም ፓርቲታት አብ ዝመጽእ ክልተ ሰሙናት ገና ፈታኒ ዝኾኑ ምርጫታት ይጽበዮም ኣሎ።
ምሉእ ትሕዝቶ አብዚ ምስማዕ ይክኣል።
መባእታዊ ምርጫ ሕጹያት ተወዳደርቲ ንፕረዝደንት ኣሜሪካ
