ንኺድ ናብ ዋንጫ ኩዕሶ እግሪ ዓለም 2018

ግጥም ብራዚል ሜክሲኮ ብዓወት ብራዚል ክልተ ብ ባዶ ተዛዚሙ ኣሎ።

ብራዚል ዝተመከሓትሉ ነይማር ነታ ሃገራዊት ጋንታ ዓዲ ውዒል ኣይገበራን። ኣቐዲሞም ከም መሲ ናይ ኣርጀንቲና ሮናልዶ ናይ ፖርቱጋል ሃገራውያን ጋንታታቶም ብዙሕ ትጽቢት ዘንበራሎም ህቡባት ተጻወቲ፡ ንሃገራውያን ጋንታታቶም ኣብኲሮመን እዮም። ነይማር ከ ዝብል ኣሰሮም ክስዕብ ድዩ ዋላ ነታ መቐናቕንታን ኣጸቢቓ ሜላ ጸወታ ከምእትፈልጦ እትግለጽ መክሲኮ ኣይከናሕስየላን እዩ ዝብል ሕቶ ኣብ ነፍስ ወከፍ ኣፍቃሪ ስፖርት ዓለም ቅጅል ኢሉ እዩ ጸኒሑ።

እንሆ ናይ ደቒቕ ጸወታን ተወሳኺ ሽዱሽተ ደቒቕ ተዛዚሙ ዳኛ ምልክት መዛዘሚ ጸወታ ፊስካ ድሕሪ ምንፍሑ ነይማር ዘይከም ሮናልዶንን መሲን ርእሱ ኣቕኒዑዩ ምስ ደገፍቱን ኣፍቀርቲ ስፖርትን ተመሳጊኑን ንሃገራዊት ጋንታ ብራዚል ድማ ናብ ዝቕጽል ግጥም ርብዒ ፍጻመ የሕሊፉን ካብ ሜዳ ወጺኡ።

ተቐይሩ ዝኣተወ ፊርሚኖ ብወገኑ ዝተዋህቦ ዕዮ ብግቡእ ዝፈጸመ እዩ ዝመስል። ክልተ ደቒቕ ድሕሪ ኣብ ሜዳ ምእታዉ እታ ዛዛሚትን ተስፋ መክሲኮ ዳርጋ ሙሉእ ብሙሉእ ዘጸልመተት ካልአይቲ ሸቶ ብምምዝጋብ ውሕስነት ዘለዎ ዓወት ንሃገራዊት ጋንትኡ ብራዚል ካልአይቲ ሸቶ ኣስኒቑ።

ጽሟቕ ስታቲስካዊ ኣሃዛት ግጥም ብራዚልን መክሲኮን

--> ብራዚል ዋላኳ ክልተ ብባዶ ትተዓወት ብኩዕሶ ምሓዝ ብመክሲኮ ተበሊጻ እያ። ብራዚል 46% መክሲኮ 54%

--> ብሓፈሻ ብራዚል 21 ግዜ ናብ መክሲኮ ፈተነ ዘካየደት ክትከውን እንከላ: መክሲኮ ግን 13 ግዜ ጥራይ እያ ፈተነ ኣካይዳ።

--> ናብ ጎል ዘቕንዓ 10 ፈተነታት ብራዚል ነይረን። ብወገን መክሲኮ ድማ ሓንቲ ጥራይ ናብ ሸቶ ዘቕንዓ ፈተነ ኣብ ልዕሊ ብራዚል ተኻይዱ።

--> ክልቲአን ጋንታታት ዳርጋ ማዕረ ዕድል ናይ ኮርነር እየን ረኺበን። ብራዚል 8 ኮርነት ክትረክብ እንከላ መክሲኮ ድማ ሸውዓተ ረኺባ።

--> ጎል ናይ ምምዝጋብ ዕድል ዝነበረ ግን ዝደሓና ብወገን ብራዚል ሓንቲ ክትኸውን እንከላ; ብወገን መክሲኮ ግን ሾመንተ እየን ነይረን።

ግጥም ሽወደንን ስዊዘርላንድን

ሽወደንን ስዊዘርላንድን ካብተን 10 ሃገራት ኤውሮጳ ናብ ግጥም ፍጻመ ዝሓለፋ ሃገራውያን ጋንታታት እየን።

ክልቲአን ሃገራውያን ጋንታታት ዘካይድኦ ዘለዋ ግጥም ኣውዲቕካ ምሕላፍ እምበኣር ወሳኒ ጥራይ ዘይኮነ ሜላ ኣጸዋውትአን እውን ብደቂቕ ስለዝፋለጣ ሓንቲ ነታ ሓንቲ ብቐሊሉ ስዒራ ክትሓልፍ ክብድ ከይበለን ኣይክተርፍን እዩ።