ንኺድ ናብ ዋንጫ ኩዕሶ እግሪ ዓለም 2018

ናይዚ ዕለት ሳልሳይ ግጥም ዴንማርክ ምስ ፔሩ ኮይኑ፣ ሃገራዊት ጋንታ ፔሩ ንብዙሓት ከሰራስራ ዝወዓላ ተደጋጋሚ ብሉጻት ፈተነታት ብምክያድ ንልዳት ዴንማርክ ክኹዕኩሑ እኳ እንተወዓሉ ሸቶ ከመዝግቡ ከይቀንዖም ተጻዒሮም እዮም ወጺኦም።

ዴንማርክ ብመገዲ ዮሱፍ ፖልሰን እታ እንኮ ሸቶ ናይቲ ግጥም ብምምዝጋብ ሃገራዊት ጋንታ ደንማርክ ሙሉእ ነጥቢ ሓፊሳ ክትወጽእ ኣኽኢልዋዩ።

ፔሩ ድሕሪ 36 ዓመታት ናብ ግጥማት ዋንጫ ዓለም ትሳተፍ ዘላ ደቡብ ኣመሪካዊት ሃገር እያ።

ኣብ ዝሓለፈ ኣብ ዋንጫ ሸውዓተ ግጥማት ዘካየደት ኮይና; ኣብ ኩለን እተን ዘካየደተን ሸውዓተ ግጥማት ተዓዊታ ኣይትፈልጥን። ሓሙሽተ ግዜ ተሳዒራ ክልተ ግዜ ድማ ብማዕረ ዝተፈላለየት እታ ምስ ኩሉቲ በርቃዊ ጸወታኡ ዕድል ዘይብላ ተባሂላ እንተተገልጸት ዘይውሕዳ ሃገራዊት ጋንታ ኮይና እያ ትግለጽ።

ደንማርክ ብወገና ካብተን ኣብ ታሪኻ ኣብ መኽፈቲ እግራ ዘካየደተን ሓሙሽተ ግጥማት ዋንጫ ዓለም ኣብተን ኣርባዕተ ዓወት ሰኒቓያ ወጺኣ። ኣብ 2010 ጥራይ ብሃገራዊት ጋንታ ነዘርላንድ ስዕረት ዘጋጠማ ልዑል ተመኩሮ ግጥማት ዋንጫ ዓለም ዘለዋ ሃገር እያ።

ብዘይካዚ ደንማርክ ምስ ዝተፈላለያ ሃገራት ደቡብ ኣመሪካ ኣብ ዘካይደተን ኣርባዕተ ናይ ዋንጫ ዓለም ግጥማት: ኣብተን ሰለስተ ተዓዊታ እያ። ኣብ 1998 ግን ብብራዚል ከምዝተሳዕረት ታሪኻዊ ድሕረ ባይታኣ የረድእ።

በዚ ድማ ዩ ደንማርክ ናይ ተሞክሮ ብልጫ ሒዛ ኣንጻር ፔሩ ዝቐረበት ክትኸውን እንከላ: እታ በርቃዊ ጸወታ ዘርኣየት ፔሩ ግን ክትዕወት ኣይከኣለትን።

ካብ ኩሉ ዝኸፍአ ሊዮነል መሲ ፍጹም ቅላዕ መቕጻዕቲ ብምስሓቱ እቲ ቐንዲ ተቐናቓኒኡ ክርስትያኖ ሮናልዶ ግን ዝተዋህበቶ ፍጹም ቅላዕ መቕጻዕቲ ብውሕሉ ቅላዕ ምምዝጋቡ ጥራይ ዘይኮነ ተደጋጋሚ ሸቶታት ኣብ ልዕሊ ሃገራዊት ስጳኛ ብምምዝጋቡ : ኣርጀንቲና ትምክሓሉ ህቡብ ተጻዋታያ ምስ ክርስትያኖ ሮናልዶ ከምዘይዳረግ ሓጺር መረዳእታ'ዩ።

እቲ ዝኸፍአ ግን ብሕጂ ኸ ዝብል ኮይኑ? ሊዮነል መሲ እዚ ናይ ፈለማ እግሪ ጸውታኡ ኣብ ዝቕጽል ግጥማቱ ንዕኡን ነታ ሃገራዊት ጋንታ ኣርጀንቲናን ኣሉታዊ ተጽዕኖ ክገድፍ ስለዝኽእል: ኣርጀንቲና ኣብ ከቢድ ሻቕሎት ተሸሚማ ትርከብ።

ግጥም ኣርጀንቲና ምስ ኣይስላንድ ብብዙሓት ኣፍርቀርቲ ስፖርት ዳርጋ ግጥም ሓርማዝን ዕንቅርዖብን ኮይኑ'ዩ ቀሪቡ።

ውጽኢቱ ኣቐዲሙ ኣርጀንቲና ክትዕወትያ ብዝብል ግምት ክልቲአን ሃገራውያን ጋንታታት ናብ ሜዳ ዝኣተዋ ክኾና ከለዋ: ብቐንዱ ግን ህቡብ ኣርጀንቲናዊ ሊዮነል መሲ እንታይ ታሪኽ ክሰርሕ'ዩ ናብ ዝብል ኣቶኩሮ ዝገበረ'ዩ ነይሩ። ብፍላይ መዘንኡን መቐናቕንትኡን ዝኾነ ፖርቱጋላዊ ክርስትያኖ ሮናልዶ ትማሊ ምስ ሃገራዊት ጋንታ ስጳኛ ኣብ ዘካየዶ ግጥም ኣብ ዋንጫ ዓለም ናይ ፈለማ ሃት ትሪክ ሰርሑ ድሕሪ ምውጻኡ፤ ኩሉ ኣቓልቦ ናብ መሲ ኣድሂቡ።

ኣብ ግጥም ኣርጀንቲና ምስ ኣይስላንድ መሲኸ እንታይ ከርእየና'ዮ ዝብል ትጽቢት ዓሲልዎ ዝወዓለ ግጥም ድማ'ዩ ነይሩ ።

ይኹን'ምበር ዕዳጋስ ኣዴኻ ከምዝለኣኸትካ ዘይኮነ ከምዝጸንሓካ'ዩ ከምዝብል ምስላ ትግርኛ: መሲ ካብ ትጽቢት ብዙሓት ወጻኢ ኮይኑ'ዩ ናይ ፈለማ ናይ ዋንጫ ዓለም ጸወታኡ መሲሱ።

በዚ ድማ ከይኮነ ኣይተርፍን ኣርጀንቲና ነጥቢ ተማቒላ ብማዕረ ዝኾነ ውጽኢት ማለት ሓደ ብ ሓደ ዝኾነ ናይ ሓባር ውጽኢት ምፍልላ'ያ ንብዙሓት ኣርጀንቲናውያንን ካልኦት ደገፍታን እንኮላይ ኣብቲ ቦታ ቐሪቡ ዝዕዘብ ዝነበረ ብሉጽ ተጻዋታይ ኩዕሶ እግሪ ዓለም ዝነበረ ዲያጎ ማራዶና ክቑጥዑ ዝተራእዩ።

ኣርጀንቲና ብ ሰርጅዮ ኣጉየሮ ኣብ ዋንጫ ዓለም ናይ ፈለማን መኽፈቲትን ኣብ መበል ደቒቕ ሸቶ ከተመዝግብ እንከላ ኣይስላንድ ድማ ብመገዲ ኣልፍረድ ፊንቦጋሶን ኣብ መበል ማዕረ እትገብር ሸቶ ኣመዝጊባ።

ሎሚ ቀዳም ቀጺሉ ኣብ ዝወዓለ ዋንጫ ዓለም 2018 ፈረንሳ ምስ ኣውስትራልያ ዝገጠመት ኮይና፤ እቲ ግጥም ኣብ ታሪኽ ዋንጫ ኩዕሶ እግሪ ዓለም ታሪኻዊ ዘብሎ ፍጻመ ዝተሰነደሉ ኮይኑ'ዩ ቀሪቡ።

ናይ ፈለማ ብሓገዝ ቪድዮ ዝተሰነየ ውሳነ ዳኛ ማለት VAR ተባሂሉ ዝጥቀስን ንፈለማ ግዜ ኣብ ዋንጫ ዓለም ዝተኣታተወን ኣገባብ: ሃገራዊት ጋንታ ፈረንሳ ኣብ መበል 55 ደቒቕ ናይቲ ሸቶ ዘይተመዝገቦ ጸወታ ፍጹም ቅላዕ ክትረክብ ኣኽኢልዋ'ዩ።

ኣንቶይን ግሪዝማን ከየላበወ ሸቶ ኣመዝጊቡ ፈረንሳ መሪሕነት ክትጭብጥ ዘኽኣለ'ኳ እንተኾነ: ድሕሪ ሓሙሽተ ደቒቕ ኣውስትራልያ'ውን ብተመሳሳሊ ብሓገዝ ቪድዮ ዝተረጋገጸ ውሳነ ዳኛ ማዕረ እትገብርን ንመሪሕነት ፈረንሳ እትቖጽን ሸቶ ተመዝጊቡ። ፈረንሳ 1 ኣውስትራልያ 1 ።

ጸወታ ክዛዘም ሒደት ክተርፎ እንከሎ ግን ህቡብ ፈረንሳዊ ኣጥቃዓይ ፖል ፖግባ ዳግማይ ንሃገራዊት ጋንትኡ ተዐውት ሸቶ ኣመዝጊቡ። በዚ ድማ ፈንረሳ 2 ብ 1 ዝኾነ ውጽኢት ናይ ፈለማ ናይ ምድብ ጸወታኣ ተዓዊታ ክትወጽእ ክኢላ እያ።