ኣዲስ ኣበባ —
ከተማ ሽረ ሎሚ ሓሙስ ታሕሳስ 8,2022 ሓይሊ ኤሌክትሪክ ከምዝረኸበት ክፍሊ ሓይሊ ኤሌክትሪክ ኢትዮጵያ ኣፍሊጡ።
ዳይሬክተር ኮሚኒኬሽን እቲ ትካል ኣቶ ሞገስ መኮንን ንድምፂ ኣመሪካ ከምዝሓበርዎ፣ እታ ከተማ ሓይሊ ኤሌክትሪክ ክትረክብ ዝኸኣለት፣ ካብ ግድብ ተከዘ ክሳብ ሽረ ናይዘሎ መስመር ፅገና ሎሚ ድሕሪ ምዝዛሙ ምዃኑ ሓቢሮም። ናይ ከተማ ሽረ ሓይሊ ኤሌክትሪክ ምርካብ ነተን ክሳብ ሑመራ ዘለዋ ካልኦት ከተማታት እውን ብተመሳሳሊ ሓይሊ ንምቕራብ ዘኽእል ከምዝኾነ ኣቶ ሞገስ ወሲኾም ገሊፆም።
ኣብዚ ሰሙን ከተማ መቐለ ምስ ሃገራዊ መስመር ሓይሊ ኤሌክትሪክ ምርኻባን፣ በዚ መስመር ትጥቀም ከምዘላን ዘመልከቱ ኣቶ ሞገስ፣ ብኣንፈት ደቡብ ክሳብ መቐለ ዘለዋ ከተማታት እውን ተጠቀምቲ ሓይሊ ኤሌክትሪክ ከምዝኾና ኣመልኪቶም።
