ንኺድ ናብ ዋንጫ ኩዕሶ እግሪ ዓለም 2018

ፕረዚደንት ሩስያ ፑቲንን ልኡል ስዑድ ዓረብ መሓመድ ቢን ሳልማን ኣብ መኽፈቲ ግጥም ዋንጫ ዓለም ኣብ ሞንጎ ክልቲአን ሃገራት

ሃገራዊት ጋንታ ሩስያ ብመገዲ ደኒስ ቸርየቭ ኣቢላ ኣብ መበል 43 ደቒቕ ካልአይቲ ሸቶ ኣብ ልዕሊ ስዑድ ዓረብ ድሕሪ ምምዝጋብ ቀዳማይ እብረ ጸወታ ተወዲኡ ። ክልቲአን ጋንታታት ድማ ንናይ 15 ደቒቕ ዕረፍቲ ወጺአን ኣለዋ።

ውጽኢት ቀዳማይ እብረ ጸወታ: ሩስያ 2 - ስዑድ ዓረብ 0

ሃገራውያን ጋንታታት ሩስያን ስዑድ ዓረብን ድሕሪ ኣብ 1993 ኣብ ኮባር ስዑድ ዓረብ ተራኺበን ዘካየደኦ ምሕዝነታዊ ግጥም እዚ ሎሚ ኣብ መኽፈቲ ዋንጫ ኩዕሶ እግሪ ዓለም ዘካይድኦ ዘለዋ ግጥም ናይ ፈለማ እዩ።

ኣብ 1993 ሃገራዊት ጋንታ ስዑድ ዓረብ ኣብ ልዕሊ ሃገራዊት ጋንታ ሩስያ 1 ብ 0 ዝኾነ ውጽኢት ተዓዊታ ምፍልላያ ይዝከር።

ሃገራዊት ጋንታ ሩስያ ድሕሪ 1970 ንፈለማ ግዜያ ኣብ መኽፈቲ ስነ ስርዓት ዋንጫ ዓለም ትቐርብ ዘላ።

ኣብ 1970 ሃገራዊት ጋንታ ሩስያ ከም ሕብረት ሶቭየት ትፍለጥ ዝነበረትሉ ግዜ ክኸውን እንከሎ: ኣብ መኽፈቲ ግጥም ምስ ሃገራዊት ጋንታ መክሲኮ ተጋጢማ። ክልቲአን ሃገራውያን ጋንታታት ድማ ባዶ ብ ባዶ ከምዝተፈላለያ ሰነዳት ዋንጫ ዓለም ፊፋ ይጠቅስ።