ዋሽንግተን —
ንዝሓለፉ 8 ዓመታት ናይ ዓለምና ኣዝዩ ሓያል መንግስቲ ኣሜሪካ መራሒ ዝነበሩ ፕረዚደንት ባራክ ኦባማ፣ ሻንጣኦም ጠቅሊሎም ካብ ቤተ መንግስቲ (ዋይት ሃውስ) ዝወጹሉ ሰዓታት ብኣጻብዕቲ ዝቁጸራ ኮይነን ኣለዋ። ተካኢኦም ተመራጻይ ፕረዚደንት ዶናልድ ትራምፕ ጽባሕ ቀትሪ ቃለ መሓላ ክፍጽሙ’ዮም። እዋን ስግግር ስልጣን ኣሜሪካ ብዓይኒ ክልተ ኣጋይሽ ንምርኣይ ተፈቲኑ’ሎ።
ኣቶ ዳንኤል ኣበበ ‘ፕረዚደንት ኦባማ ልዕሊ ትጽቢትና ሰሪሖም’ ኢሉ ከሞግሶም ከሎ ኣቶ ካሕሳይ ግና ‘ስራሕ ኦባማ ብታሪኽ ፍርዲ ክረክብ’ዩ፣ እንተኾነ ሕጊ ክንክን (ኦባማ ኬር) ከቢድ ፋይናንሳዊ ጾር’ዩ ኣውሪዱልና’ ይብል። ‘ኦባማኬር ብምምሕዳር ትራምፕ ክቅይር’ዩ ዝብል ስግኣት ኣብ ቦትኡ ኣሎ።
ፕረዚደንት ባራክ ኦባማ ኣብ ዛዛሚ ሰዓት ስልጣኖም ኣብ ልዕሊ ሱዳን ተነቢሩ ካብ ዝነበረ እገዳ ንገለ ክፋሉ ንክላዓል ወሲኖም’ዮም። ምስ ሩስያ ድማ ኣብ ሓያል ምስሕሓብ ኣትዮም ነይሮም።
ብዛዕባ ምምሕዳር ኦባማን ሓድሽ ምምሕዳር ትራሞን ዝምልከት ዝተኻየደ ዘተ ኣብዚ ምስማዕ ይክኣል።
