ኢትዮጵያ- ቁጽሪ ብምህማም መሬት ዝሞቱ ሰባት ናብ 250 ክብ ኢሉ

ኣብ ኢትዮጵያ ዞባ ጎፋ ወረዳ ጎፋ ብዘጋጠመ ምህማም መሬት ቁጽሪ ዝሞቱ ሰባት 250 ምብጽሑን ጻዕሪ ህይወት ምድሓን ነብሲ ቐጺሉ ከምዘሎ ቤት ጽሕፈት ኮሚኒኬሽን መንግስቲ ክልል ደቡብ ኣፍሊጡ።

ኣብ ኢትዮጵያ ዝርከብ ኤምባሲ ኣመሪካ ሓዊሱ ዝተፈላለዩ ትካላትን መሻርኽቲ ኣካላትን በቲ ሓደጋ ዝተሰማዖም ሓዘን ገሊጾም ሓገዝ ከምዝህቡ 'ውን ኣፍሊጦም'ለዉ።

ንስድራ ግዳያት ጉድኣት ንዝወረዶምን ሓዘኑ ዝገለጸ ኤምባሲ ኣመሪካ መንግስቲ ኣመሪካ ብዩ.ሴኤስ.ኤ.ኣይ.ዲ ኣቢሉ ከምዝሕግዝን ንካልኦት ትካላት ሰብኣዊ ረድኤት'ዉን የተሓባብር ከምዘሎን ነቲ ጉዳይ ብቀረባ ይከታተሎ ምህላዉን ገሊጹ'ሎ።

ዓሙቕ ሓዘን ከም ዝተሰመዖ ዝገለጸ ፈደራል መንግስቲ ኢትዮጵያ'ውን ንስራሕ ህይወት ኣድሕንን ጉድኣት ንዝወረዶም ንምጥያሶምን ካብ ዝተፈላለዩ ኣካላት ዝተዋጽአሓይሊ ዕማም ናብቲ ከባቢ ከም ዝተላእከ ቤት ዕዮ ኮሚኒኬሽን ኣፍሊጡ'ሎ።

ኮሚሽን ሰብኣዊ መሰላት ኢትዮጵያ(ኢሰመኮ) ብወገኑ ዝርከብ ስብኣዊ ሓገዛት ብዝተወደበን ብቅልጡፍን ክቀርብ ኣለዎ ኢሉ'ሎ።

ብኻልእ ዝተተሓሓዘ ዜና ኣብ ክልል ደቡብ ምዕራብ ኢትዮጵያ ዞባ ቤንቾ ሸኮ ወረዳ ሰሜን ቤንቾ ብዝወረደ ምህማምን ምስንጣቅን መሬት 208ሰባት ካብ መንበሪኦም ተመዛቢሎም'ለዉ።