ስነ-ጥበበኛታት ኣብ ቤተ-መዘከር ዓድዋ ምትእትታው ክግበር ይጽውዑ

ኣብቲ ኣብ ኣዲስ ኣበባ ከባቢ ፒያሳ ዝህነፅ ዘሎ፣ ቤተመዘክር ዓድዋ ዝቕመጡ ስራሕቲ ስነጥበብ ብዝምልከት ቅሬታ ከምዘሕደረ ማሕበር ሰኣልትን ቀረፅትን ኢትዮጵያ ኣፍሊጡ። ኣቦ-መንበር እቲ ማሕበር ኣቶ ወንድወሰን ከበደ፡ ንድምፂ ኣመሪካ ኣብዝሃቦ መብርሂ፣ እቲ ማሕበር፡ ኣብቲ ቤተመዘክር ብዛዕባ ዝቕመጡ ስእልታት፡ ሓውልታትን ቅርፅታትን ሕቶ ከምዘለዎ ገሊፁ። ነዊሕ ዕድመን ልዕሊ 500 ኣባላትን ዘለውዎ እቲ ማሕበር፣ ብዛዕባ እዚ ጉዳይ ርእይቶ ከይህብ ከምዝተገበረ ዝሓበረ ኣቶ ወንደሰን፡ እዚ ናይ ሰብ ሞያ ርእይቶ ዘይተሓወሶ ስራሕ፣ ምምሕዳር ከተማ ኣዲስ ኣበባ መሊሱ ክርእዮን ቀዳማይ ሚኒስትር ኣብይ ኣሕመድ እውን ኢዱ ከእቱን ሓቲቱ።