ሰራሕተኛታት ህይወት ኣድሕን ደ/ ኣፍሪቃ ሬሳታት 8 ዓደንቲ ኣውጺኦም፡ 400 ተሪፎም

ሰራሕተኛታት ህይወት ኣድሕን ህይወት ደቡብ ኣፍሪቃ፡ ስቲልፎንተይን ኣብ ዝተባህለ መዕደኒ ስፍራ ሬሳታት ሸሞንተ ዘይሕጋውያን ዓደንቲ ኣውጺኦም። ድሕሪ’ዚ ዝደሓረ ስርሒት፡ በቲ መስርሕ ሞይቶም ዝተረኽቡ ብዝሒ ዘይሕጋውያን ዓደንቲ ናብ 100 ደዪቡ ኣሎ።

ሰብ-መዚ ከኣ ገና 400 ዝበጽሑ ዓደንቲ ኣብ ትሕቲ መሬት ተደብዮም ምህላዎም ይገልጹ።

ፖሊስ ነቶም ኣብ ውሽጢ ኣትዮም ምውጻእ ዝኣብዩ ዘለዉ ዓደንቲ ንኽወጽኡ ንምግዳድ መግቢን ካልእ ቀረባትን ንውሽጢ ከይኣትዎም ከልኪሉ ኣሎ። እቲ ናይ ድልያ መስርሕ ዝጀመረ፡ ኣብ ቀረባ እዋን ካብቶም ኣብ ውሽጢ ተዓጽዮም ዝነበሩ ዓደንቲ፡ “ከም ሃመማ” ይረግፉ ምህላዎም ደብዳበ ንደገ ድሕሪ ምልኣኾም’ዩ።

ኣብ ዝሓለፈ ሰሙን ላዕላይ ቤት ፍርዲ ደቡብ ኣፍሪቃ፡ ናብቶም ኣብ ትሕቲ መሬት ንዕደና ወርቂ ኣትዮም ዘለዉ ዓዳኖ ቀጻሊ መግቢ፡ ማይን ካልእ ቀረብን ክውሕዞምን እቲ መጠን ከይጎድልን መምርሒ ሂቡ ነይሩ።