መቐለ —
ፍሉይ ልኡኽ ኣመሪክ ኣብ ቀርኒ ኣፍሪቃ ኣምባሳድር ማይክ ሃመርን ኣምባሳድር ኣመሪካ ኣብ ኢትዮጵያ ኤርቪንግ ማሲንጋን ናብ መቐለ ብምጕዓዝ ምስ ሓለፍቲ ተቓወምቲ ውድባትን ፕረዚደንት ውድብ ህወሓት ዶክተር ደብረጽዮን ገብረሚካኤልን ተራኺቦም ዘትዮም። እቶም ሰብ-መዚ ኣመሪካ ምስ ተቓወምቲ ውድባት ብወግዒ ክራኸቡ ንፈለማ እዋኖም ምዃኖም ዝገለጹ ካብቶም ተሳተፍቲ፡ ስምምዕ ተጻብኦ ፕሪቶሪያ ብምሉእነት ክትግበር፡ ግዝኣታዊ ሓድነት እቲ ክልል ክሕሎን ንጉዳያ ምርጫ ኣመልኪቶም ምዝርራቦምን ንድምጺ ኣመሪካ ሓቢሮም።
ከም ሓበሬታ እቶም ተሳተፍቲ’ቲ ርክብ፡ እቶም ኣመሪካውያን ሰብ-መዚ’ውን ኣብ ስምምዕ ተጻብኦታት ደቡብ ኣፍሪቃ ዛጊት ዘይተፈጸመ ዝብሉዎ ኣካላት ብምጥቃስ፡ ኣመሪካ ኣብ ምፍጻም እቲ ስራሕ ክትዓዪ ምዃና ኣመልኪቶም። ካብ መንጎ’ቶም ኣዘራረብቲ ጉዳያት ምምላስ ውሽጣውያን ተመዛበልቲን ምውጻእ ናይ ደገ ሓይልታት ካብ ክልል ትግራይን ምዃኖም’ውን ተፈሊጡ።
ብወገን ወከልቲ ኣመሪካ ድማ ንምጥያስ ኣባላት ዕጡቓት ክሰርሑ ምዃኖም ብምግላጽ፡ መንግስቶም ነቲ መዓላ ዝኸውን ባጀት ከም ዝሰለዐ’ውን ገሊጾም።
ቅጥዒ