ድሕሪ ዕጽዋ ንምክልኻል ቫይረስኮሮና ኣመንቲ እስልምና ኢፍጣር ብሓባር የካይዱ

ኣብ ዙርያ ዓለም ዝርከቡ ኣመንቲ እስልምና፥ ለበዳ ኮቪድ19 ካብ ዝጅምር፡ ጾም ሮሞዳን ከኽብሩ ንሳልሳይ ግዜኦም`ዩ።

ኣብዚ ኣብ ኣመሪካ፡ ድሕሪ ሰለስተ ዓመት ንመጀመርያ ጊዜ ብዘይ ዝኾነ ደረት፡ ጸሎቶምን ጾሞምን ብሓባር ተኣኪቦም ከካይዱ ክኢሎም ኣለዉ።

ጾም ሮመዳን ንኣመንቲ እስልምና ኩሉ ግዜ ሓባራዊ ውራይ ኮይኑ`ዩ ጸኒሑ። እዚ ዓመት`ዚ ድማ፡ድሕሪ ለበዳ ኮቪድ19 ንመጀመርያ ግዜ ብምልኣት ተኣኪቦም ጾሞም ከፍጥሩ ክኢሎም ኣለዉ።

ኣብዚ ኣብ ከባቢ ዋሺንግተን ዲሲ ዝርከብ ኢማም ዝተባህለ ማእከል ዝተኻየደ ስነ-ስርዓት ኢፍጣር፡ ኣወሃሃድቲ`ቲ በዓል፡ ንኣመንቲ እኹል መግብን ዝስተን ምህላዉ ከረጋግጹ ላዕልን ታሕትን ይብሉ።

ኢታ ራይሞንድ ሓንቲ ካብ ኣወሃሃድቲ`ያ።

እዛ ኣዋሃሃዲት ኢፍጣር"እቲ ዝኸበደ ክፋል ስራሕና፡ ክንደይ ዝኾኑ ሰባት ከምዘለዉና ምግማት`ዩ። ዝሓለፉ ክልተ ዓመታት ብሰንኪ ዝነበረ ደረት ኮቪድ19 ፡ቁጽሪ`ቶም ብሓባር ዘፍጥሩ ሰባት ውሱን`ዩ ኔሩ።ሎሚ ንኢፍጣርን ሓባራዊ ስግዳናን ክሳብ ዝደለናዮ ብዝሒ ሰባት ክንቅበል ክኢልና ኣለና። ብጣዕሚ መሳጢ`ዩ" ትብል ።

ቅድሚ`ቲ ለበዳ ዝነበረ ስነ-ስርዓት ኢፍጣር፡ ምሉእ ወርሒ መዓልታዊ`ኳ እንተኾነ፡ ኣብዚ እዋን`ዚ ግን እቲ መስጊድ ኢማም፡ ዓርቢ ቀዳምን ሰንበትን ጥራሕ`ዩ ተቐቢሉ ብሓባር ዘፍጥር ዘሎ።

እቲ ጸሎት ግን ምሸታዊ`ዩ፡ እዚ ድማ ድሕሪ ናይ ሰለስተ ዓመት ብኦንላይን ዝግበር ዝነበረ፡ ንመጀመርያ ግዜኦም`ዮም ብሓባር ተኣኪቦም ክሰግዱ።

ናቢል ሲራኑቢ ካብ ሰጋድያን መስጊድ ማእከል ኢማም`ዩ፡"ኩሉ ሰብ ናብዚ ብኣካል መጺኡ ብሓባር ጾሙ ክፈትሕ ምርኣይ ኣዝዩ ደስ ዘብል`ዩ" ይብል።

ካልእ ኢዝራ ታውሂድ ዝተባህለ ድማ፡ ለበዳ ኮቪድ19 ካብ ከምዚ ዝበለ ሓባራዊ ጸሎት`ዩ ኣጊዱና ጸኒሑ ይብል።

እቲ ኢማም ማእከል ብኢንዶነዥያውያን ዝተመስረተ`ኳ እንተኾነ፡ ንኹሎም ኣመንቲ ምስልምና ክፉት`ዩ።

ሳውሂር ዝተባህለ ሶርያዊ ኣመሪካዊ፡ ብዛዕባ`ቲ ኢፍጣር ርእይትኡ ክህብ ከሎ፡ ኣብዚ በብዓይነቱ መግብታት ይርኢ ኣለኹ፡ ምስ ናይ ሶርያ ሃገረይ`ውን ተመሳሳልነት ኣለዎ ይብል፡፡

ሮመዳን፡ ንኣመንቲ እስልምና እዋን ሃይማኖታዊ ትምህርቲ`ውን`ዩ። እቲ መስጊድ ኣብ እዋን ለበዳ ኮቪድ19 ዘተኣታተዎ ናይ ኦንላይን ኣገባብ ትምህርቲ ኣብዚ እዋን`ዚ`ውን ቀጺልዎ ይርከብ።

መብዛሕቲኦም ኢንዶነዥያውያን ነቲ `ቤት ምኽሪ ፊቕ ሰሜን ኣመሪካ` ዝተባህለ ምምሕዳር`ዮም ዝኽተሉ።

ብእኡ መሰረት ድማ፡ ጾም ሮመዳን ዝሓለፈ ሚያዝያ ክልተ ዝጀመሩ ክኾኑ ኸለዉ፡ ባሕቲ ግንቦት ድማ ዒድ ኣል-ፈጢር፡ ማለት ምዝዛም ጾም ወርሒ ሮሞዳን ክኸውን ትጽቢት ይገብሩ።