ዋና ጸሓፊ ሕ/ሃ እስራኤልን ፍልስጤምን ብቕልጡፍ ተኹሲ ደው ከብሉ ጸዊዑ

ባይቶ ጸጥታ ሕቡራት ሃገራት ሎሚ ሓሙስ ብዛዕባ ግጭት እስራኤልን ፍልስጤማውያንን ህጹጽ ኣኼባ የኻይድ ኣሎ። እቲ ህጹጽ ኣኼባ ዝካየድ ዘሎ ብውድብ እስላማዊ ምትሕብባርን ብሃገራት ዓረብን ዝቕረበ ሕቶ`ዩ።

ልዕሊ 10 ዝኾኑ ሚኒስትራት ጉዳያት ወጻኢ ኣብቲ ኣኼባ ክርከቡ ናብ ኒው ዮርክ ከይዶም ኣለው:: ድሕሪ ምጅማር ለበዳ ኮሮናቫይረስ ባይቶ ጸጥታ በዚ ደረጃ ብኣካል ኣኼባ ከካይድ ንመጀመርያ ግዜ`ዩ ።

እቲ ኣብ ወሽመጥ ቓዛ ዝካየድ ዘሎ ግጭት ብህጹጽ ደው ክብል ዝጽውዕ ዘሎ ዋና ጸሓፊ ሕቡራት ሃገራት ኣንቶንዮ ጉተረዝ ኣብቲ ፍሉይ ኣኼባ መደረ ኣስሚዑ`ዩ።

ሎሚ ሓሙስ`ውን ተወሳኺ ዶብ-ሰገር ምትዃስ ኔሩ`ዩ- ነፈርቲ ኩናት እስራኤል ድማ ንኸተማ ቓዛን ከተማታት ዳኢር ኣል-ብላሕን ኻን-ዮኑስ ወቒዐን ኣለዋ።

ሚኒስትር ጉዳያት ወጻኢ ጀርመን ምስ ሰበ-ስልጣን እስራኤልን ፍልስጤማውያንን ንምዝርራብ ሎሚ ናብቲ ከባቢ ተጓዒዙ`ሎ- ። ዑደተይ ምስ ክልቲኦም ህዝብታት ዘለና ሓድነት ንምርኣይ`ዩ ዝበለ ሃይኮ- ማኣስ፡ ናብ ልዝብ ሰላም ብዛዕባ ምምላስ ከምዘልዕል`ውን ሓቢሩ`ሎ።

ናይ እስራኤል ቀዳማይ ሚኒስትር በንጃሚን ነተንያሁ ትማሊ ነቲ ብፕረዚደንት ኣሜሪካ ጆ ባይደን ዝቐረበ እስራኤል ደብዳባ ክተጉድል ዝጽውዕ- ክሳብ ዕላማና ነዐውት ክንቅጽሎ ኢና ብምባል ነጺግዎ`ሎ- ።

በቲ ግጭት ዛጊት 64 ቆልዑት ዝርከብዎም 227 ሰባት ኣብ ቓዛ ኣብ እስራኤል ድማ 12 ከምዝሞቱ ይግለጽ ኣሎ።