ዋና ጸሓፊ ሕ/ሃ ቫይረስ ኮሮና ንምዕባለታት ኣፍሪቃ ብኣሉታ ይጸልዎ'ሎ ኢሎም

ዋና ጸሓፊ ውድብ ሕቡራት ሃገራት ኣንቶንዮ ጉተረዝ፥ ንለበዳ ቫይረስኮሮና ኣብ ኣፍሪቃ ንምግታእ ዓለምለኸ ሓድነት ክህሉ ጸዊዖም። ንሶም ወሲኾም ነታ ኣህጉር ካብ ፋይናንሳዊ ቅልውላው ንምድሓን፥ ስርዓታት ጥዕናን ቀረባት-መግብን ንምሕያል ኣገዳሲ ምዃኑ ኣዘኻኺሩ።

ጉተረስ፡ ሃገራት ኣፍሪቃን ሕብረት ኣፍሪቃን ነቲ ቫይረስ ኣብ ምክልኻል ንዝወሰድዎ ስጉምቲ`ቲ ውን ኣመጉሶም።

ዋና ጸሓፊ ሕቡራት ሃገራት ኣብ ምክልኻል ቫይረስኮሮና ሃገራት ኣፍሪቃ ዝወሰድኦ ስጉምቲ ድሕሪ ምምጓስ እቲ ለበዳ ንዕበየት ኣፍሪቃ ኣብ ሓደጋ ኣውዲቑ`ሎ ይብል።

እቲ ለበዳ፥ ነቲ ዝጸንሐ ዘይምዕሩይ ናብራ፥ ዘይበለየ ጥምየት፡ ጉድለት ኣመጋግባን ተቐላዕነት ሕማምን ከምዘጋድዶ`ውን የዘኻኽር።

ኣፍሪቃ ተፍርዮም ነገራት፥ ቱሪዝም ከምኡ`ውን ካብ ኣብ ወጻኢ ዝነብሩ ዝልኣኽ ገንዘብ ብምጉዳሉ ሚልዮናት ናብ ድኽነት ክሽመሙ`ዮም ዝበለ ኣንቶንዮ ጉተረዝ፥ ክታበት ኣብ ዝርከበሉ እዋን ንኹሉ ማዕረ ዕድል ዝኸፍት ክኸውን ኣለዎ ኢሉ።

ከም ሓበሬታ ማእከል ምክልኻልን ምቁጽጻርን ሕማማት ኣፍሪቃ፥ ኮቪድ 19 ልዕሊ 2,800 ሰባት ኣብታ ኣህጉር ቀቲሉ`ሎ- መብዛሕቲኦም ኣብ ደቡብ ኣፍሪቃ: ግብጺ:ኣልጀር:ያ ሞሮኮን ናይጀርያን`ዮም።

ግብጺ ኣብ ጾም ሮመዳን ኩሉ ኣብ ገዝኡ ክዕጾን ኣብ ደገ ድማ ማስኬራ ክገብርን ኣዚዛ`ላ።

ኣብ ስጳኛ ድማ ካብ ጽባሕ ሓሙስ ጀሚሩ ነቶም ክልተ ሜትሮ ክፈናተቱ ዘይክእሉ ቆልዑ፥ ልዕሊ ሽዱሽተ ዓመት ዝኾኑ ኩሎም ማስኬራ ክገብሩ ኣዚዛ`ላ።

ቻይና ድማ ትማሊ ኣብ ጂሊል ዝተባህለት ክፍለ-ግዝኣት ሓዲሽ መልከፍቲ ስለ-ዝረኸበት ኣብ ምክልኻሉ ዓጢቓ`ላ።

ኣብ ህንዲ፡ ካብ ገጠራት ናብ ከተማ ምስ ኣተዉ ብሰንኪ ምዕጻው ቫይረስ ኮሮና ተዓጽዮም ዝነበሩ ሰራሕተኛታት ነናብ ዓዶም ክምለሱ ዕድል ይኽፈተሎም ኣሎ- ባቡራት ህንዲ ካብ ባሕቲ ሰነ ጀሚረን ኣብ ሰሙን ክልተ ግዜ ክንቀሳቐሳ`የን።

ባሕቲ ሰነ ንሆላንድ ከኣ ሓዲሽ ምዕራፍ`ያ- ኣብያተ መስተን መግብን ኣብያተ ሲነማታትን ኣዳራሻት ክኽፈታ`የን።

ኣብ ዙርያ ዓለም ብኮሮና ቫይረስ ዝተለኽፉ 4.9 ሚልየን- ዝሞቱ 323 ሺሕ ምምዝጋቦም ተሓቢሩ’ሎ።