ኣብ ካናዳ ንክታበት ቫይረስ ኮሮና ዝቓወም ሰልፊ ተኻይዱ

ንክታበት ቫይረስ ኮሮና ዝቓወሙ ብኣሸሓት ዝቑጸሩ ካናዳውያን ናብ ዋና-ከተማ ኦታዋ ብምውሓዝ ኣብ ከባቢ ፓርላማ`ታ ሃገር ጽርግያ መካይን ኣጽዮም።

እቲ ሰልፊ ኣብ ካናዳ ነቲ ለበዳ ዝምልከት ዝተኻየደ ዝዓበየ ሰልፊ ምዃኑ ይንገረሉ`ሎ። ይኹን`ምበር ኣብታ ልዕሊ 80 % ህዝባ ከምዝተኸተቡ ዝንገረላ ካናዳ እቶም ተሰለፍቲ እኹል ተደናገጽቲ ዝረኸቡ ኣይመስሉን።

ቀዳማይ ሚንስተር ጃስቲን ትረዶ ነቶም ክታበት ንምቅዋም ዝተሰለፉ ኣሸሓት ሰባት ፡ ብናይ ውዲት ስነ-ሓሳብን ብግጉይ ሓበሬታን ዝምርሑ ቁንጣሮ`ዮም ኢልዎም። ኣስዒቡ ካናዳውያን በዞም ውሑዳት ጸረ-ሳይንስ ግን ዓው በሃልቲ ኣይውከሉን`ዮም ኢሉ። እቶም ኣይትከተቡ ዝብሉ ተሰለፍቲ ኣብ ኦታዋ ዝርከብ ከባቢ ፓርላማ መካይን ዓጽዮም ውዒሎም`ዮም።