ኣብ ብራዚል ብዘጋጠመ ብርቱዕ ዝናብ ዘስዓቦ ምንሽርታት መሬት 94 ሰባት ሞይቶም

ኣብ ብራዚል ብዘጋጠመ ሓያል ዝናብ ዘስዓቦ ምንሽርታት መሬት ብውሑዱ 94 ሰባት ምሟቶም ተፈሊጡ።

ከንቲባ ከተማ ፔትሮፖሊስ ሩበንስ ቦም ቴምፖ ንጋዜጠኛታት ኣብ ዝሃቡዎ መግለፂ ሰራሕተኛታት ህይወት ኣድሕንን ወለንተኛታትን ሰባት ምድላይ ቀፂሎም ከምዘለው፤ እንተኾነ ብዝሒ ዝሞቱ ሰባት ክውስኽ ከምዝኽእል ሓቢሮም።

ሰበ ስልጣን ብራዚል ኣብቲ ናይ ህይወት ኣድሕን ስርሒት 21 ሰባት ብህይወት ምርካቦም ትማሊ ረቡዕ ገሊፆም ነይሮም።

እቲ ውሑጅ ኣብ ኣፃድፍ ንዝነበሩ ኣባይቲ ዘዕነወ ክኸውን ከሎ ንመኪናታት እውን ወሲዱ።ኣስታት 80 ኣባይቲ ከምዝዓነውን ኣስታት 400 ተመዛበልቲ ድማ ዝበዝሑ ኣብ ኣብያተ ትምህርቲ ተዓቑቦም ከምዘለው ሰበ ስልጣን'ታ ሃገር ገሊጾም።