ኣብ ቡርኪፋሶ ድሕሪ ዝተኻየደ ዕልዋ ደገፍ ንሩስያ ይውስኽ ምህላው ተሓቢሩ

ደገፍቲ ዕልዋ መንግስቲ ቡርኪናፋሶ፡ ባንዴራ ሩስያ ሒዞም ክሕጎሱን እታ ሃገር ምሕዝነታ ካብ ፈረንሳ ናብ ሩስያ ክትቕይር ክጽውዑን ተራእዮም።

ኣብ ቡርኪናፋሶ ዘሎ ደገፍ ሩስያ ስፍሓቱ ንጹር`ኳ እንተዘይኮነ፡ ኣብቲ ኣንጻር እስላማዊ ምልሻታትን ሸፋቱን ዝግበር ባእሲ ብዙሓት ብጻዕርታት ፈረንሳ ዝተሰላቸዉ ምዃኖም ግልጺ ኮይኑ`ሎ።

ፈረንሳ ንዝሓለፈ ሽዱሽተ ዓመታት ንቡርኪናፋሶ ወተሃደራዊ ደገፍ ክትገብር ጸኒሓ`ያ።

ኣብ ጎረቤታ ማሊ ድማ ብዕልዋ ዝመርሕ ዘሎ ኮሌነል ኣሲሚ ጎይታ ምስ ክረምሊን ምትእስሳር ኣለዎም ዝብሃሉ ሩስያውያን ዕጡቓት ኩባንያ ዋግነር ናብታ ሃገር ክኣትዉ ከምዝገበረ ይዝከር`ዩ።