ኣብ ሰሜናዊ ናይጀሪያ ዝተራእየ ሕማም ሸሮኽ ዓቢ ስግኣት ይፈጥር ምህላዉ ተገሊጹ

ዋሽንግተን — 

ኣብ ዝሓለፈ ቀረባ ሳምንቲ፡ ካኖ ዝተህለ ሰሜናዊ ክፋል ናይጀሪያ፡ ሕማም ሸሮኽ ብምልባዑ ዓቢ ስግኣት ጥዕና ፈጢሩ ኣሎ። እዚ ሓድሽ ለብዒ፡ ነቲ ድሮ ብለበዳ ኮቪድ-19 ተዳኺሙ ዘሎ ስርዓተ-ጥዕና ናይጀሪያ ዓቢ ስግኣት’ዩ።

ወርሓት ዝናብ፡ ብወገን ሰሜን ዝርአ ዘሎ ስእነት ጸጥታን ዝሕቱል ግብረ-መልሲ መንግስቲን ተደማሚሮም፡ ንሓደገኝነት እቲ ለበዳ የግዳዱ ምህላዎም ሰብ-መዚ ጥዕና’ቲ ኣውራጃ ይገልጹ። ንርእሰ-ከተማ ኣቡጃ ሓውስካ፡ 22 ካብተን 36 ኣውራጃታት’ታ ሃገር ድሮ በቲ ሕማም ተለኺፈን ከም ዘለዋ ማእከል ክንክን ጥዕና ናይጀሪያ ኣመልኪቱ።

ብዝተበከላ ማይ ዝመሓላለፍ ሕማም ሸሮኽ፡ ግቡእ ክንክን እንተ ዘይረኺቡ፡ ኣብ ውሽጢ ሰዓታት ሰብ ክቐትል ዝኽእል’ዩ።

ኣብታ ዝተሓተ ቀረባት ጥዕና ዝጸንሓ ሰሜናዊ ክፋል እታ ሃገር ምርኣዩ እምበኣር፡ ኣመና ኣሻቓሊ ገይሩዎ ኣሎ።

ብመሰረት ጸብጻባት ጥዕና፡ ኣብ ኣውራጃ ካኖ ጥራይ፡ ካብ ወርሒ መጋቢት ንደሓር 186 ሰባት በቲ ሕማም ሞይቶም ኣለዉ። ቍጽሪ ናይቶም ኣብ ምሉእ ናይጀሪያ ብሰንኪ’ቲ ሕማም ዝሞቱ ዜጋታት ድማ ዛጊት 653 በጺሑ ኣሎ።

ናይጀሪያ በዚ ሕማም ሸሮኽ ትህረም ዘላ፡ ቍጽሪ መልከፍቲ ኮቪድ-19፡ ኣመና ኣብ ዝበዝሓሉ ኣብ ዘሎ እዋን’ዩ።