ባሉን ስለያ ቻይና ከይኸውን ዝተጠርጠረ ኣብ ሰማያት ኣመሪካ ክበርር ድሕሪ ምቕናዩ ዝሓለፈ ቀዳም ተወቒዑ ክወድቕ ምስ ተገብረ፡ ዝምልከቶም ሰራሕተኛታት ኣመሪካ ነቲ ስብርባር ኣብ ምእራይ ተዋፊሮም ኣለዉ።
ውጽኢት መርመራ`ቲ ዝወደቐ ባሉን ነቶም ዘለዉ ሕቶታትን ኣብ ምሕዝነት ኣመሪካን ቻይናን ወሳኒ ተራ ከምዝህልዎ ይግለጽ ኣሎ።
ካብ ርሑቕ ክርኣይ ከሎ ሓደ ንቡር ስርሒት`ዩ ዝመስል። ሓንቲ ነፋሪት ኩናት ኣመሪካ ናብቲ ባሉን ወይ ሰብ ዝሰርሖ ዓቢይ ፍሒኛ ብምቕራብ ነቲ ብኣየር ዝንሳፈፍ ዝነበረ ወቒዓ ከም ዝወድቕ ጌራቶ`ላ።
ሚንስተር መጉዓዝያ ኣመሪካ ፒት ቡቲጀጅ ምስ ሲ.ኤን.ኤን ኣብ ዝገበሮ ቃለ-መጠይቕእቲ ባሉን ዝወደቐሉ ቦታ ኣስታት 11 ኪ.ሜ ዝንውሓቱ`ዩ። ነቲ ስጉምቲ ቅድሚ ምውሳድ ጥንቃቐ ዝመልኦ መደባት`ዩ ተኻይዱ ይብል።
“ፕረዚደንት ትእዛዝ ኣብ ዝሃበሉ እዋን ወተሃደራዊ ሓይሊ ድማ ዝተፈላለዩ ሓደጋታትን ረብሓታትን ኣብ ግምት ዘእተወ ሚዛን ወሲዱ`ዩ። እቲ ስርሒት ድማ ኣብ ልዕሊ ዝኾነ ኣመሪካዊ ህይወት ኮነ ንብረት ሓደጋ ከየውረደ ተፈጺሙ`ሎ።”
ቻይና እታ ባሉን ሓበሬታ ሜትሮሎጂ`ምበር ካልእ ዕላማ ከምዘይነበራ ብምግላጽ ነቲ ስጉምቲ ተቓዊማቶ`ላ።
ጡረተኛ ሪር ኣድሚራል ሓይሊ ባሕሪ ኣመሪካ ማይክ ሙለን ፡ን ኤ.ቢ.ሲ ኣብ ዝሃቦ ቃለ-መጠይቕ እንተኾነ፡ ሚንስተር ጉዳያት ወጻኢ ኣመሪካ ኣንተኒ ብሊንከን ናብ ቻይና ክገይሽ ኣብ ዝዳለወሉ ዝነበረ እዋን እቲ ባሉን ክበርር ምግባሩ፡ ነቲ መገሻ ንምትዕንቓፍ ብገለ ኣባላት ወተሃደራዊ ሓይሊ ቻይና ዝተገብረ ክኸውን ይኽእል`ዩ ይብል።
“ብስትራተጂ ዓይኒ ክትርእዮ ከለኻ ንምሕዝነት ኣመሪካን ቻይናን ዝጎድእ`ዩ። እቲ ኣገዳሲ ሕቶ ዝኸውን፡ ኣብ ቻይና፡ የማናይ ኢድ ዝገብሮ ጸጋማይ ኢድ ይፈልጦ`ዶ ዝብል`ዩ።”
ሕጂ ነቲ ስብርባር ዝውደቐ ባሉን ክእረይን፡ ብዛዕባ ዕላማን ትሕዝቶን`ቲ ባሉን ዘሎ ሕቶታት ምላሽ ክህብን ኣብ ልዕሊ ምምሕዳር ባይደን ጸቕጢ ይሕይል ኣሎ።
ሪፓብሊካን ኣባል ባይቶ ማይክ ተርነር ምስቲ ምምሕዳር ባይደን ነታ ባሉን ኣቐዲሙ ወቒዑ ከውድቓ ኔርዎ ዝብል ርእይቶ-ነቐፍቲ ይሰማማዕ።
“ቻይና ንባዕላ ተጻባኢት ኮይና ዘቐመጠት ሃገር`ያ። ወተሃደራዊ ዓቕምታቶም የስፍሑ`ለዉ። ኑክሌራዊ ዓቕምታቶም ብሰለስተ ዕጽፊ የሐይሉ ኣለዉ። ልዑል ቅልጣፈ ዘለዎ ኣጽዋራት ይሰርሑ ኣለዉ። ኣብ ጠፈር`ውን ዓቕሞም እናስፍሑ`ዮም ዝኸዱ ዘለዉ።”
ፔንታገን ማለት ሚንስትሪ ምክልኻል ኣመሪካ ብወገኑ፡ ንዕኡ ዝወዳደር ዓቕምታት ኣብ ቦትኡ ከምዘሎ የረጋግጽ።
ሕጂ ነቲ ስብርባር ዝወደቐ ባሉን ዝኣርዩ ዘለዉ ሰበ-ስልጣን ምክልኻል እቲ ስራሕ ከቢድ ከምዘይኮነ ይገልጹ ኣለዉ ፡ክንደይ ከምዝወስድ ግን ግምት ክህቡ ኣይክኣሉን።