ኢትዮጵያን ሩስያን ስምምዕ ወታሃደራዊ ምትሕብባር ምፍርራመን ተገሊጹ

አዲስ አበባ — 

ኢትዮጵያን ሩስያን ንሰለስተ መዓልታት ኣብ ዝተፈላለየ መዳያት ሽርክነት ክመያየጣ ድሕሪ ምቕናይ ስምምዕ ወተሃደራዊ ምትሕብባር ተፈራሪመን።

ብመሰረት ኣገልግሎት ዜና ፋና፡ ሓላፊት ፋይናንስ ሓይልታት ምክልኻል ኢትዮጵያ ማርታ ሊዊጂ ፡ እቲ ስምምዕ ንምሕዝነት ክልቲአን ሃገራት ናብ ዝለዓለ ደረጃ ዘሰጋግር`ዩ ኢላ`ላ።

ኣገልግሎት ዜና ፋና እቲ ምስ ሩስያ ዝተገብረ ስምምዕ ንሓይልታት ምክልኻል ኢትዮጵያ ብዓቕምን ፍልጠትን ብቴክኖሎጅን ዘሳግር ምዃኑ`ውን ኣብቲ እዋን ገሊጹ`ሎ ።

ብተመሳሳሊ ዜና ሱዳን ኣብ ግዝኣታ መደበር ሓይሊ ባሕሪ ሩስያ ንምኽፋት ንስምምዕ ትዳሎ ከምዘላ ኣፍሊጣ። እዚ ዝተገልጸ ሚኒስትር ጉዳያት ወጻኢ ሱዳን ማሪያም ኣል-ሳዲቅ ኣል ማሕዲ ኣብ ሞስኮ ምብጻሕ ብምግባር ምስ ሚኒስትር ጉዳያት ወጻኢሩስያ ሰርገይ ላቭሮቭ ኣብ ዝተራኸበትሉ እዋን`ዩ።