ሱዳን፡ ሓደሽቲ ሲቪል ዞባዊ ኣመሓደርቲ ክመዝዙ ዝጠልብ ሰልፊ ተኻይዱ

ዋሽንግተን — 

ብዓሰርተታት ዝቑጸሩ ነበርቲ ክፍለ ግዝኣት መዳኒ ሱዳን ኣብ እዋን መሪሕነት ፕረዚደንት ኣል በሽር ኣብ መዝነት ዝጸንሑን ሕጂ’ውን ኣብ መዝነት ዘለው ሰበ ስልጣን ክወርዱ ብምጥላብ ትማሊ ሰንበት ሰልፊ አካይዶም።

እቲ ትማሊ ሰንበት ኣብ ከተማ ዋድ መዳኒ ዝተኻየደ ናይ ተቓውሞ ሰልፊ ምስ ማሕበር ሰብ ሞያ ሱዳናዊያን ምትእስሳር ብዘለዎ ናይቲ ከባቢ ጉጅለ ዝተጸወዓ ምኳኑ ተፈሊጡ’ሎ።

ማሕበር ሰብ ሞያ ሱዳናዊያን ነቲ ኣብ ወርሒ ሚያዝያ ንመሪሕነት ፕረ. ኣል በሽር ዘውደቐን ኣብ መንጎ ወታሃደራዊን ሲቪላዊ መሪሕነት’ታ ሃገር ስምምዕ ምምቕራሕ መዝነት ክህልው ዘፍቐደ ተቓውሞ ዝመርሓ ምዃኑ ይዝከር።

ኣብ ማሕበራዊ መራኸቢ ብዙሃን ዝተዘግሓ ምስሊ ናይቲ ትማሊ ሰንበት ኣብ ከተማ ዋዲ መዳኒ ዝተኻየደ ናይ ተቓውሞ ሰልፊ ተሳተፍቲ መንእሰያት ምዃኖምን ናይ ሱዳን ባንደራ ብምሓዝ ኣመሓዳሪ’ቲ ዞባ ካብ መዝነቶም ክወርዱ ጸዊዖም ኣለው።

ማሕበር ሰብሞያ ሱዳናዊያን ሲቪል ዞባዊ ኣመሓደርቲ ክምዘዙን ኣብ እዋን መሪሕነት ፕረዚደንት ኣል በሽር ዝተመስረተ ሃገራዊ ፓርቲ ክፈርስ ክጽውዑ ምጽንሖም ይፍለጥ።

ይኹን ደአ እምበር ብመሰረት ዝተበጽሓ ስምምዕ ምስ ተቓወምቲ’ታ ሃገር ሰላም ክሳብ ዝፍጠር ሲቪል ኣመሓደርቲ ናብ ምምሕዳራትን ክፍለ ግዝኣትን ኣይምዘዙን’ዮም።