ምውሳኽ ቀረባት ክታበት ቫይረስኮሮና ንቁጠባ ዓለም ዘበራርብ'ዩ ክብል ኣህጉራዊ ማዕከን ገንዘብ ሓቢሩ

ቀረባት ክታበት ኮቪድ 19 እናወሰኸ ይከይድ ብምህላዉ፡ ቁጠባ ዓለም ናብ ዕብየት ገጹ ይእንፍት ኣሎ ክብል ኣህጉራዊ ማዕከን ገንዘብ (IMF) ኣፍሊጡ።

እቲ ትካል ትማሊ ሰሉስ ኣብ ዘውጽኦ ትንበያ ቁጠባ ዓለም ብልዕሊ 5% ክዓቢ`ዩ ኢሉ።

ዓለማዊ ማዕከን ገንዘብ ክታበት ቫይረስኮሮና ንዝርግሐ`ቲ ቫይረስ ክዓግቶ ስለዝኾነ መንግስታት`ውን ኣብ ምዕጻው ዘሎ ኣካይድኦም ከፍኩሱ ከኽእሎም`ዩ ይብል።

ብመሰረት ሓበሬታ'ቲ ትካል ቁጠባ ኣመሪካ ኣብ 2020 ብ3.4% ወሪዱ ድሕሪ ምጽናሕ ሕጂ ግን ምስቲ ፕረዚደንት ባይደን ዝበሎ ናይ 1.9 ትሪልየን ዶላር ድጎማ ተደሚሩ- እቲ ቁጠባ ኣብዘን ዝቕጽላ ሰለስተ ዓመታት ብልዕሊ 5% ክዓቢ`ዩ።ቁጠባ ኤውሮጳ`ውን ብ7.2% ተሸምሪሩ ድሕሪ ምጽናሕ ኣብዚ ዓመት`ዚ ብ 4.2% ክትንስእ`ዩ።

ኣብ ምክልኻል ለበዳ ቫይረስኮሮና ዝውሰድ ዘሎ ናይ ክታበት ኣወንታዊ ተርእዮታት ኣብ ግምት ብምእታው ህንዲ ካብ ዝኾነት ሃገር ንላዕሊ ቁጠባኣ ብ 11.5 % ክዓቢ`ዩ ዝበለ ማዕከን ገንዘብ ዓለም፡ ኣህጉራዊ ንግዲ`ውን ብ9.6 % ወሪዱ ድሕሪ ምጽናሕ- ብ8.1% ክትንስእ`ዩ ኢሉ`ሎ።