ሚኒስተር ፍትሒ ሊባኖስ ሓዊሱ ሰለስተ ሚንስትራት'ታ ሃገር ካብ መዝነቶም ለቂቖም

ዋሽንግተን — 

ሚንስትር ፍትሒ ሊባኖስ ሜሪ ክላውዴ ናጂም ሎሚ ሶኑይ ካብ መዝነተን ለቂቐን። ኣብ ዝሓለፈ ሰሙን ኣብ ከተማ ቤሩት ከቢድ ሓደጋ ፍንጀራ ዘጋጥም ንደሓር መዝነቶም ካብ ዝለቐቑ ሳልሰይቲ ሚንስትር ኮይነን ኣለዋ።

ሚንስትር ከባቢያዊ ሓለዋ ዳማኒዮስ ካታርን ሚንስትር ሓበሬታ ማናል ዓብደል ሳማድን ብተመሳሳሊ ትማሊ ሰንበት ብድልየቶም ካብ መዝነቶም ወሪዶም ኣለው። ብርክት ዝበሉ ካልኦት ሚንስትራት'ውንካብ መዝነቶምንምውራድ ድልየት ከምዘለዎም ተሓቢሩ ኣሎ።

ልዕሊ 30መራሕቲ ዓለም ኣብ ዘካየድዎ ናይ ቴሌኮንፈረንስ ኣኼባ ኣብ ቤሩት ንዘጋጠመ ሓደጋ ንምሕጋዝ ኣስታት 300 ሚሊዮን ዶላር ንምውፋይ ትማሊ ሰንበት ቃል ኣትዮም ኣለው።

ኣብ ዝሓለፈ ሰሙን ኣብ ቤሩት ብዘጋጠመ ሓደጋ ብውሑዱ 158 ሰባት ሞይቶም ኣስታት 6,000 ሰባት ድማ ከምዝቖሰሉ ተፈሊጡ ኣሎ።