ዋሽንግተን —
ሚንስትር ጉዳያት ወጻኢ ኣመሪካ ኣንተኒ ብሊንከን ምስ ወከልቲ 20 ሃገራት ደቡብ ኣመሪካ ብዛዕባ ጉዳይ ኢሚግረሽን ንኽዘራረብ ንናይ ክልተ መዓልታት ዘተ ኣብ ፓናማ ኣትዩ`ሎ።
ቅድሚ`ቲ ዝርርብ ኣብ ዝነበረ ወግዓዊ እንግዶት ዝተዛረበ ብሊንከን፡ ኢሚግረሽን ዞባዊ ብድሆ ጥራይ ዘይኮነስ ዓለማዊ`ዩ ኢሉ።
"ኣመሪካ ምስ ኩሉኻትኩም ብሽርክነት ንምስራሕ ድልውቲ`ያ" ዝበለ ብሊንከን፡ "እቲ ስራሕ ኣብ ልዕሊ መርበባት ኣሰጋገርቲ ይኹን ምምሕዳራት ዶባት፡ ከምኡ'ውን ምምሕያሽ ሕጋዊ ኢምግረሽን ዝበሉ ጉዳያት ንምዝርራብ ድልዋት ኢና" ኢሉ።
ዝመጽእ ወርሒ ሰነ`ውን ንሰሜንን ደቡብን ኣመሪካ ዝጠርነፈ ዋዕላ ኣመሪካ ኣብ ሎስ ኣንጀልስ ክካየድ`ዩ ።
ብሰንኪ ደረት ኮቪድ19 ብዶብ ሜክሲኮ ንዝኣትዉ ሓተቲ ዑቕባ ዝውሃብ ዝነበረ ዕድል ደው ኢሉ ድሕሪ ምጽናሕ ሕጂ ግን ክፈኩስ ተገይሩ`ሎ።