ዋሽንግተን —
ላዕለዎት ወታሃደራዊ ሰበ ስልጣን ኣመሪካ ብዛዕባ ምዝዛም ውግእ ኣፍጋኒስታንን ድሕሪ 20 ዓመታት ዝተኻየደ ምውጻእ ወታሃደራት ኣመሪካ ስዒቡ ንዝነበረ ሕንፍሽፍሽን ብዝምልከት ሕቶታት ክቀርበሎም'ዩ።
ሚኒስተር ምክልኻል ሊዮድ ኦውስተን ኣቦ መንበር ሓባራዊ ኣዘዝቲ ጀነራል ማርክ ኬነዝ መከንዚን ጽባሕ ረቡዕ ኣብ ቅድሚ ኮሚቴ ወታሃደራዊ ኣገልግሎት ሰኔት ቀሪቦም ብዛዕባ'ቲ ኣብ ኣፍጋኒስታን ዝነበረ ምዝዛም ወታሃደራዊ ስርሒትን ከምኡ'ውን ውጥናት መጻኢ ወታሃደራዊ ጸረ ግብረ-ሽበራን ቃለ ምስክርነት ክህቡ'ዮም። ንዝቀርበሎም ሕቶታት' ዉን መልሲ ክህቡ'ዮም።
ቤት ጽሕፈት ምክልካል ኣመሪካ ፔንታጎን ነቲ ካብ ኣፍጋኒስታን ንምውጻእ ዝተገብረ ውሳነን ካብኡ 21 ሽሕ ሰባት ንምውጻእ ዝተገብረ ጻዕርታትን ተኸላኺሉ'ዩ። እቲ ከይዲ ኣብ ካቡል ዓለምለኸ መዕርፎ ነፈርቲ ንሓያለ መዓልታት ሕንፍሽፍሽ ፈጢሩ ኔሩ'ዩ።