ዋሽንግተን —
መራሕቲ ዓለም ዓመታዊ ዋዕልኦም ካብ ሰንበት ጀሚሮም ኣብ ኒው ዮርክ ከካይዱ'ዮም። ቀንዲ ኣጀንዳኦም ድማ ኵናት ቓዛ፡ ሱዳንን ዩክሬንን ምዃኑ ክፍለጥ ተኻኢሉ`ሎ።
ዋና ጸሓፊ ሕቡራት ሃገራት ኣንቶኒ ጉተረዝ ናይ ሎሚ ዓመት ዋዕላ፡ ኣብ ዓለም ብዘሎ ግጭታት ዝተዓብለለ ከም ዝኸውን ኣተንቢሁ`ሎ።
“ካብ ቁጽጽር ዝወጸ ጂኦ-ፖለቲካዊ ኩነታት ኢና ዘለና። ካብ መንጎኦም ድማ ግጭታት ቓዛ፡ ዩክሬን፡ ከምኡ`ውን ሱዳን ተጠቀስቲ`ዮም።"
ኵናት ቓዛ ዓመቱ ይቐርብ ኣሎ- ልዕሊ 41 ሺሕ ፍልስጤማውያን ተቐቲሎም፡ ካብ እስራኤል ጅሆ ዝተታሕዙ ኣማኢት ሰባት ገና ኣይተለቐቑን። ኣብ ሕቡራት ሃገራት ምቁራጽ ተኹሲ ንምግባር ኣብ ስምምዕ ክብጻሕ ድማ ዘለዎ ዕድል ትሑት`ዩ።