ዋሽንግተን —
ኲናት ሰሜን ኢትዮጵያ ክልል ትግራይ ዘብቀዐ ውዕል ሰላም ድሕሪ ምኽታሙ ኣስታት ሓደ ዓመት’ውን ኣብ ኢትዮጵያ ገበናት ኲናት ይፍጸም ከምዘሎ ጉጅለ ክኢላታት ሰብኣዊ መሰላት ሕቡራት ሃገራት ገሊጹ።
ኣብ ጄነቫ መግለጺ ዝሃቡ ኣቦ መንበር ዓለምለኸ ኮምሽን ኪኢላታት ሰብኣዊ መሰላት ቻንዴ ኦትማን "ጅምላዊ ቅትለት፣ ጾታዊ መጥቃዕቲ፣ ጥምየት፣ ዕንወት ኣብያተ ትምህርቲን ትካላት ጥዕናን፣ ኣስገዳድ ምፍንቓልን ጅምላዊን ከየጻረኻን ማእሰርቲን ሰኒድና ኣለና። ኩሎም ማዕረ ገበን ኲናትን ኣንጻር ሰብኣዊነት ዝፍጸም ገበንን’ዮም" ኢሎም።
እቲ ሪፖርት፣ ኣብ እዋን ውግእ ብኩሎም ተዋጋእቲ ሓይልታት ተፈጺሙ ዝብሃል ግፍዕታት፣ ንጅምላዊ ቅትለት፣ ጾታዊ መጥቃዕቲ፣ ጥምየት፣ ዕንወት ኣብያተ ትምህርቲን ትካላት ጥዕናን ዘጠቃለለ እዩ።