ዋሽንግተን —
ሓደ ፕረዚደንታዊ ኣማኻሪ ዩክሬን ሎሚ ዓርቢ፡ ኪየቭ ናብ ናይ ሩስያ ዞባ ኩርስክ ሰጊራ ምጥቃዓ ፡ ሞስኮ ርትዓዊ ዝኾነ ዘተ-ሰላም ንኽትጅምር ንምእማና ኣድላዪ እዩ ኔሩ ምባሉ ጸብጻብ ሮይተርስ ይሕብር። ምይካይሎ ፖዶሊያክ ኣብ ዘረብኡ፡ ዩክሬን ንኩርስክ ንምሓዝ ድልየት የባላን እንታይ ድኣ ሞስኮ ናብ ዘተ-ሰላም ንክትመጽእ ንምግዳዳ `ዩ ኢሉ።
ዩክሬን ዝሓለፈ ሰሙን ናብ ውሽጢ ሩስያ መጥቃዕቲ ድሕሪ ምፍናው ንገለ ክፋላት ዞባ ኩርስክ ተቖጻጺራ`ያ።
ላዕለዎት ሰበ-ስልጣን ዩክሬን ደጋጊሞም፡ ኣብ ዝኾነ ስምምዕ ሰላም ልኡላውነትን ግዝኣታዊ ሓድነትን ዩክሬን ክኽበር ኣለዎ ክብሉ ጸኒሖም ኣለዉ። ኣብ 2022 ንዩክሬን ዝወረረት ሩስያ ኣብዚ እዋንዚ 18% ግዝኣት ዩክሬን ከም ትቆጻጸር ይፍለጥ።