“ቱርኪ ንኢትዮጵያን ሶማልን ትሽምግል ኣላ፡” ሮይተርስ

ዋሽንግተን — 

ድሕሪ ምፍራም ስምምዕ መዘከር ምስ ርእሰ-ምምሕዳር ሶማሊላንድ ኣብ መንጎ ኢትዮጵያን ሶማልን ንዝጸንሐን ምትፍናን፡ ቱርኪ ንምሽምጋለን ትሰርሕ ከም ዘላ ንውሽጣውያን ምንጭታት ብምጥቃስ ኣገልግሎት ዜና ሮይተርስ ሓቢሩ።

ዝርዝር ናይቲ ብመንጎኘነት ቱርኪ ዝካየድ ዘሎ ዘተ ዛጊት ኣይተሓበረን። ኣብ ባሕቲ ጥሪ ናይዚ ዓመት’ዚ ኣብ መንጎ ኢትዮጵያን ርእሰ-ምምሕዳር ሶማሊላንድን ኣፍደገ ወደባት ዘፍቅድ ስምምዕ መዘከር ድሕሪ ምፍራሙ፡ ንሞቓዲሾ ዘቖጥዐ ኰይኑ፡ ሶማል ንዝዀነ ዝርርብ ክትነጽግ ጸኒሓ’ያ።

እንተዀነ ምስ ሶማል ናይ ምክልኻል ስምምዕ ዝፈረመት ቱርኪ፡ ምስ ሞቓዲሾ ኣዝዩ ጥቡቕ ዝምድና ከም ዘለዋ’ዩ ዝፍለጥ።

ሶማል ደጋጊማ ክትነጽጎ ንዝጸንሐት ዘተ ሕጂ ብመንጎኝነት ቱርኪ ክካየድ ምስምማዓ ግን ውጽኢት ናይቲ ክመጽእ ዝኽእል ዘተ ንምፍላጡ ከም ዝኸብድ ምስቲ ጉዳይ ቅርበት ዘለዎም ወገናት ንሮይተርስ ኣካፊሎም ኣለው። እንተዀነ እቶም ሮይተርስ ዘዘራረቦም ኣካላት፡ ካብቲ ዘተ ክህሉ ብዛዕባ ዝኽእል ውጽኢት ኣመና ትስፉዋት ከም ዘይኰኑ ኣይሓብኡን።

ሮይተርስ ብዛዕባ’ቲ ኣብ ኣንካራ ዝካየድ ከም ዘሎ ዝተገልጸ ዘተ ተወሳኺ መብርሂ ካብ ሰብ-መዚ ኢትዮጵያ፡ ሶማልን ቱርኪን ንምስማዕ ዝግበሮ ፈተነ ከምዘይቀንዖ ይሕብር።