እስራኤል ኣብ ሊባኖስ ብዘካየደቶ ደብዳብ ክልተ ኣዘዝቲ ሕዝቦላህ ምቕታላ ትሕብር

ወተሃደራዊ ሓይሊ እስራኤል ሎሚ ሓሙስ 10 ጥቅምቲ 2024 ኣብ ሊባኖስ ናይ ነፈርቲ ደብዳብ ብምፍጻም ንክልተ ኣዘዝቲ ሕዝቡላህ ቀቲለ ይብል ኣሎ።

እስራኤል እቶም ኣዘዘቲ ኣሕመድ ሙስጠፋ ኣል-ሓጅን መሓመድ ዓሊ ሓምዳንን ዝብሃሉ ኮይኖም ናብ ሰሜናዊ እስራኤል ኣብ ምድርባይ ሮኬታት ዘተሓባብሩ ዝነበሩ`ዮም ትብል።

ብተወሳኺ ካብ ሊባኖስ 40 ሮኬታት ከም ዝተወንጨፈን ንገለ ከም ዘበርዓነን ወተሃደራዊ ሓይሊ እስራኤል ጠቒሱ`ሎ።

ብኻልእ ወገን፡ ፕረዚደንት ኣመሪካ ጆ ባይደን ናብ ቀዳማይ ሚንስተር እስራኤል ቤንያሚን ነተንያሁ ደዊሉ ምሉእ ድጋፉ ዳግም ከም ዝገለጸሉ ዋይት ሃዋስ ሓቢሩ`ሎ። ኣብቲ ርክብ ፕረዚደንታዊት ሕጽይቲ ካመላ ሃሪስ`ውን ተጸንቢራ ኔራ። ብዛዕባ ምፍታሕ ጅሆ ሓማስን ሰብኣዊ ጉድኣትን`ውን ከም ዝዘተዩ ወሲኹ ሓቢሩ`ሎ።

ድሕሪ`ቲ ዝሓለፈ 1 ጥቅምቲ 2024 ኢራን ናብ እስራኤል ዝወንጨፈቶ 200 ዝኸውን ሚሳይላት ነተንያሁ ኣብ ልዕሊ ኢራን ሕነ ክፈዲ ኣብ ግምት ከእትዎ ጸኒሑ`ሎ፡ ። እስራኤል ንኑክሌራዊ ትካላት ኢራን ክትሃርም ግን ባይደን ከም ዘይድግፍ ክገልጽ ጸኒሑ`ሎ።