ተዓዋቲት ሻምፕዮን ኣፍሪቃ ዝኾነት ሃገራዊት ጋንታ ብሽክለታ ኤርትራ ኣብ ኣስመራ ድሙቕ ኣቀባብላ ተጌሩላ

ተዓዋቲት መበል 12 ሻምፒዮን ብሽክለታ ኣፍሪቃ ዝኾነት ሃገራዊት ጋንታ ቕድድም ብሽክለታ ኤርትራ ሎሚ ሰሉስ ኣስመራ ኣብ ዝኣተወትሉ እዋን ካብ መዓርፎ ነፈርቲ ጀሚሩ ክሳብ ጎደና ሓርነት ውዕዉዕ ኣቀባብላ ተገይሩ`ላ።

ፕረዚደንት ኢሳያስ ኣፈወርቂ`ውን ነታ ጋንታ ኣብ ዓዲ ሃሎ ከም ዝተቐበላን፡ ኣብ ኩሉ መዳያት ስፖርት ዝዕወቱ ኣትሌታት ኣብ ኤርትራ ክፈርዩ ከም ዘለዎም ከም ዝመዓደን፡ ሚንስተር ዜና ኤርትራ ኣቶ የማነ ገብረመስቀል ኣብ ናይ ኤክስ መልእኽቱ ጠቒሱ`ሎ።

ኣብቲ ኣብ ኬንያ ዝተኻየደ ውድድር ሻምፒዮን ኣፍሪቃ፡ ኤርትራ ብደቂ ተባዕትዮን ደቀንስትዮን ሸውዓተ ወርቂ፡ ሓሙሽተ ብሩር፡ ኣርባዕተ ነሓስ ብምዕዋት`ያ ቀዳመይቲ ኮይና። ካልኣይን ሳልሳይን ድማ፡ ደቡብ ኣፍሪቃን ሞሮኮን ወጽየን።