ፕረ.ሩስያ ምስ ቀ/ሚ ኣብይ ኣሕመድ ኣብ ኣኼባ ሃገራት ብሪክስ ተራኺቦም: ተዘራሪቦም

ፕረዚደንት ሩስያ ቭላድሚር ፑትን ትማሊ ረቡዕ ኣብ ዋዕላ ሃገራት ብሪክስ ምስ ቀዳማይ ሚንስተር ኢትዮጵያ ኣቢይ ኣሕመድ ክልቲኣዊ ርክብ ጌሩ። መርገጽ ሃገራትና ኣብ መብዛሕቲኡ ዓለማውን ዞባዊን ጉዳያት ዝተቐራረበ `ዩ ዝበለ ቭላድሚር ፑትን፡ “ ኢትዮጵያ ንመብዛሕቲኡ ሩስያ ኣብ ሕቡራት ሃገራት ተቕርቦ ተበግሶታት ብምድጋፋ ነድንቕ” ምባሉ ኣሶሴይትድ ኣብ ዠርግሖ ጸብጻብ ሓቢሩ።

እቲ ንብራዚል: ሩስያ: ህንዲ: ቻይናን ደቡብ ኣፍሪቃን ዝሓቖፈ ደምበ ሃገራትብሪክስ፡ ንኢራን: ግብጺ: ኢትዮጵያ: ኢማራት ዓረብን ስዑዲ ዓረብን`ውን ብምቕባል ደምብኡ ኣስፊሑ`ሎ። ቱርኪ: ኣዘርባጃንን ማለዥያን`ውን ኣባላት ንምዃን ኣመልኪተን ኣለዋ፡ ካልኦት ሃገራት `ውን ንምጽንባር ተገዳስነት ኣርእየን ኣለዋ። ኣብቲ ኣብ ከተማ ካዛን ሩስያ ዝካየድ ዘሎ ዋዕላ ክረምሊን፡ 36 ሃገራት ዝተሳተፋ ክኾና ከለዋ፡ ነቲ ብኣመሪካ ዝምራሕ ንሩስያ ንምንጻል ዝግበር ጻዕሪ ንምብርዓን ኮይኑ ተራእዩ`ሎ።