ዋሽንግተን —
ፕረዚደንት ናይጀርያ ንዝተጨወዩ ልዕሊ 250 ተመሃሮ ንምፍታሕ ዝክፈል ገንዘብ ከይወሃብ ኣዚዙ።
ወለዲ ደቆም ንምውጻእ ብዙሕ ገንዘብ ይሕተቱ ከምዘለዉ ክሕብሩ ጸኒሖም`ዮም። ቅድሚ ሎሚ ዝጭወዩ ተመሃሮ ገንዘብ ብምኽፋል ክፍትሑ ጸኒሖም`ዮም።
ገለ ካብቲ ንምፍትሖም ዝግበር ስራሕ ምስ ሰበ-ስልጣን ከይተረፈ ዝርርብ ብምክያድ ይፈጸም ከምዝነበረ ይግለጽ`ዩ፡ ሰበ-ስልጣን ግን ነዚ ኣሉታዊ ምላሽ ይህቡ።
ሚንስተር ዜና ናይጀርያ ትማሊ ረቡዕ ከም ዝሓበሮ፡ ፕረዚደንት`ታ ሃገር ንጨወይቲ ክፍሊት ከይወሃብ ኣዚዙ`ሎ። ነቶም ቆልዑት ንምፍትሖም ብህጹጽነት ብምርኣይ ድማ ንትካላት ጸጥታ መምርሒ ተዋሂቡ ከም ዘሎ ተጠቒሱ`ሎ።
ኣብ ናይጀርያ ጭውያ ተመሃሮ ብተደጋጋሚ ከም ዝፍጸም ክግለጽ ዝጸንሐ`ዩ። ቅድሚ 10 ዓመታት ብቦኮ- ሓራም ዝተጨውያ ኣስታት 300 ኣዋልድ ተመሃሮ ኣዘራራቢ ዜና ምንባሩ ይዝከር።