ሓላፊ ቤት/ፅሕፈት ፓርቲ ብልፅግና ከተማ ቆቦ ተቐቲሎም

ደሴ — 

ኣብ ኢትዮጵያ ክልል ኣምሓራ ሓላፊ ቤት/ፅሕፈት ፓርቲ ብልፅግና ምምሕዳር ከተማ ቆቦ ኣቶ ደርቤ በለጠ ትማሊ ሰንበት መንነቶም ብዘይተፈልጡ ዕጡቓት ከምዝተቐትሉ ነበርቲ’ቲ ከባቢ ንድምጺ ኣመሪካ ገሊፆም። ኣብቲ ከባቢ ኣብ ንግዲ ተዋፊሩ ዝነበረ ሓደ መንእሰይ’ውን ኣብቲ እዋን ብዘወረዶ ጉድኣት ከምዝሞተ እቶም ነበርቲ ገሊፆም’ለዉ።

ሓላፊ ቤት/ፅሕፈት ብልፅግና ዞባ ሰሜን ወሎ ኣቶ ከድር ሙስጠፋ ብሞት አቶ ደርቤ ዝተሰመዖም ሓዘን ኣብ ኣብ ማሕበራዊ ገጻት ፌስቡክ ገሊጾም ኣለው፥ እንተኾነ ክሳብ ሕጂ ነቲ ቅትለት ሓላፍነት ዝወሰደ አካል የለን።

ንደሕንነቶም ክብሉ ሰሞም ክዕቀበሎም ዝሓተቱ ሰራሕተኛ ሆስፒታል ቆቦ ምስቶም ዝተቀትሉ ሰብ ዝነበሩ ጉድኣት ዝወረዶም ምህላዎም ግን ዝርከብሉ ኩነታት ከምዘይፈልጡ ገሊፆም።

ኣቶ ከድር ግን ምእንተ ህዝቢ ኣምሓራ ንቃለስ ኣለና ብዝብሉ ወገናት’ዩም ነቲ ቅትለት ፈጺሞም ክብሉ ኣብ ማሕበራዊ ገፆም ጽሒፎም ኣለው። ኣብቲ ከባቢ ዝንቀሳቀሱ ኣመራርሓ ፋኖ’ዮም ዝተባህሉ ንምርካብ ዝተገብረ ፈተነ ግን ኣይሰለጠን።