ኣብ ከተማ ጋምቤላ ብዝተፈጠረ ግጭት 2 ሰባት ሞይቶም

ኣብ ኢትዮጵያ፡ ከተማ ጋምቤላ ሰንበት ተወሊዑ ክሳብ ትማሊ ሰኑይ ኣብ ዝቐጸለ ግጭት ብውሑዱ ክልተ ሰባት ሞይቶም ካልኦት ኣርባዕተ ድማ ምቝሳሎም ቤት ጽሕፈት ሰላምን ፀጥታን እቲ ክልል ኣፍሊጡ። ድምጺ ኣመሪካ ብቴሌፎን ዘዘራረቦም መሰኻኽር ዓይኒ ከም ዝገልፁዎ፡ እቲ ኣብ ከተማ ብብረት ዝተኻየደ ግጭት ኣብ መንጎ ተወላዶ ብሄራት ኣኙዋክን ኑወርን ምንባሩ ብምጥቃስ፡ ካብ ክልተ ወገናት ቍሱላትን ምዉታትን ምህላዎም’ውን ተፈሊጡ ኣሎ። መጉዳእቲ ዝበፅሖም ወገናት ኣብ ቀዳማይ ብርኪ ሆስፒታል ከተማ ጋምቤላ ሕክምናዊ ሓገዝ ይግበረሎም ምህላዉ’ውን ሰብ-መዚ እቲ ሆስፒታል ንድምጺ ኣመሪካ ሓቢሮም። ኣብቲ ክልልን ከተማን በብእዋኑ ዝለዓል ግጭት ህይወት ሲቪላውያውን ዜጋታት ሓዊሱ ብዙሕ ሰብኣዊ ክሳራ ከውርድ ምፅናሑ ዝዝከር’ዩ።