ኣብ ዞባ ኣርሲ ዕጡቓት ብዝፈጸምዎ መጥቃዕቲ 36 ሰባት ምሟቶም ነበርቲ ገሊጾም

ኣዲስ ኣበባ — 

ኣብ ኢትዮጵያ ክልል ኦሮሚያ ዞባ ኣርሲ ወረዳ ሺርካ ዝሓለፈ ሰሙን ዕጡቓት ብዝፈጸምዎ መጥቃዕቲ 36 ሰለማውያን ሰባት ህይወቶም ምሕላፉ ነበርቲ ገሊጾም። ንድሕነቶም ብምስጋእ ሽሞም ክጥቀስ ዘይደለዩ ንድምጺ ኣመሪካ ከም ዝገለጽዎ ካብ መንጎ `ቶም ዝሞቱ እቶም 10 ካብ ሓደ ቤተሰብ ከምዝኾኑን እቲ መጥቃዕቲ መንነት ዒላማ ዝገበረ ምንባሩ`ውን ይጠቅሱ።

ሓላፊ ቤት ጽሕፈት ኮምኒኬሽን ኦሮሚያ ሃይሉ ኣዱኛ ኣብ ዝሃቦ ምላሽ፡ ነቲ መጥቃዕቲ ዝፈጸመ መንግስቲ ኦነግ ሸኔ ኢሉ ዝጽውዖ ዕጡቕ ሓይሊ`ዩ ኢሉ።

መንግስቲ ኦነግ ሸኔ ዝብሎ ሰራዊት ናጽነት ኦሮሞ ብወገኑ፡ ብወሃቢ ቓሉ ኦዳ ተርቢ ጌሩ ኣብ ዝሃቦ ምላሽ፡ ንሕና ንህዝቢ ፈሊና ኣይነጥቅዕን ኢና፡ እቲ ኣብ ባይታ ዘሎ ሓቂ ዝምስክሮ ካልእ `ዩ ብምባል፡ እኳ ደኣ ፡ባዕላቶም ንዝፈጸምዎ እዮም ናባና ዘላግብዎ ዘለዉ ክብል ንመንግስቲ ከሲሱ`ሎ።

ኣብዚ ሰዓት`ዚ ሓይልታት ጸጥታ መንግስቲ ኣብቲ ከባቢ ሓለዋ ይገብሩ ከም ዘለዉ እቲ ወሃቢ ቓል ኦሮምያ ንድምጺ ኣመሪካ ሓቢሩ`ሎ።