ምላሽ ኮሚቴታት መንነት ኣምሓራ ወልቃይትን ራያን ንኣኸራኻሪ ቦታታት ክልላት ትግራይን ኣምሓራን

ደሴ — 

ኣብ መንጎ ክልላት ትግራይን ኣምሓራን ዘከራኽር ቦታታት ብህዝበ ውሳነ ንክፍታሕ ኣብ ስምምዕ ምብጽሑ ከም ዝፈለጡ፡ ኮሚቴታት መንነት ኣምሓራ ወልቃይትን ራያን ኣፍሊጦም።

ንኣፈጻጽምኡ ብዝምልከት ምንቅስቓሳት ተጀሚሩ ምንባሩ`ውን ጠቒሶም። ግዚያዊ ምምሕዳር ክልል ትግራይ ግን ህዝበ ውሳነ ክግበር ኣብ ስምምዕ ተበጺሑ ንዝብል ሓበረታ ጌጋ`ዩ፡ ብመሰረት ስምምዕ ፕሪቶርያ ብሕገመንግስቲ ጥራሕ `ዩ ክፋታሕ ዘለዎ ምባሉ ተጠቒሱ`ሎ።

ናይ ወልቃይት ጠገዴ ሰቲት ሑመራ መንነት ኮሚቴ ኣተሓባባሪ ኣቶ ዋኘው ደሳለኝ ድማ፡ ሕቶታት እቲ ከባቢ ብህዝቢ ውሳነ ክፍታሕ ክልል ትግራይ ኣብ ስምምዕ በጺሑ ኔሩ`ዩ ይብል።

ግዚያዊ ምምሕዳር ክልል ትግራይ ድማ ፈደራል መንግስቲ ብረፈረንደም ይፈታሕ ዝብል መግለጺ ምውጽኡ ኣካል ናይቲ ፍታሕ ካብ ምዃን ሓሊፉ ኣካል ናይቲ ጸገም ክኸውን ዝወሰነ ይመስል ክብል ነቒፍዎ`ሎ። ብዛዕባ `ዚ ካብ ክልል ኣምሓራ ተወሳኺ ርእይቶ ንምስማዕ ዝተገብረ ፈተነ ኣይሰለጠን።