ደቡብ ኮርያ -- ቅድሚ ምንቃላ ኣብ ዝተቓጸለት ነፋሪት፡ ኵሎም ተሳፈርቲ ድሒኖም

ንኣባላት በረራ ሓዊስካ 176 ሰባት ሒዛ ዝነበረት፡ ንብረት ኣየር-ቡሳን ዝዀነት ነፋሪት፡ ኣብ ደቡባዊ ምብራቕ ደቡብ ኮርያ ቅድሚ ምንቃላ ተባሪዓ። እታ ነፋሪት ብቕድሚኣ ወገን ሓዊ ነኺሳ ክትቃጸል ምስ ጀመረት፡ ኣብኣ ዝነበሩ ኵላቶም ብሰላም፡ በቲ ናይ ህጹጽ እዋን መንገዲ ኣቢሎም ምውጻኦም ሰብ-መዚ ትራንፖርት ደቡብ ኮርያ ገሊጾም።

ኣብ እዋን ምድሓን ሰለስተ መጠናዊ መቝሰለቲ ከም ዝገጠሞም ዝገለጸ በዓል መዚ ኣቭየሸን እታ ሃገር፡ ጠንቂ እቲ ንምጥፋኡ ኣስታት ሓደ ሰዓት ዝወሰደ ሓደጋ ይምርምሮ ከም ዘሎ ኣመልኪቱ።

ሰሉስ ኣማስያኡ ዘጋጠመ ሓደጋ፡ ሓደ ወርሒ ድሕሪ’ቲ ኣብታ ሃገር 179 ዝቐተለ ሓደጋ ነፋሪት’ዩ ዝኸውን ዘሎ።