ፑቲን ምስ ትራምፕ ንምርኻብ ዘለዎ ቅሩብነት ገሊጹ

ቤተ-መንግስቲ ክረምሊን፡ ፕረዚደንት ሩስያ ቭላድሚር ፑቲን ምስ ኣብ ቀረባ እዋን ፕረዚድነት ኣመሪካ ዝቕበል ዶናልድ ትራምፕ ብኣካል ተራኺቡ ንምዝርራብ ዘለዎ ቅሩብነት ገሊጹ።

ወሃብ-ቃል መንግስቲ ሩስያ ዲሚትሪ ፐስኮቭ፡ ፑቲን፡ ንትራምፕ ሓዊሱ ምስ ብዙሓት መራሕቲ ሃገራት ንምርኻብ ድሉው’ዩ ኢሉ።

ትራምፕ ብወገኑ ኣብ ቀረባ ግዜ ኣብ ፍሎሪዳ ኣብ ዝሃቦ ጋዜጣዊ መግለጺ፡ ፑቲን’ውን ንምርኻብ ዘለዎ ድሌት ኣሚቱ ነይሩ። ትራምፕ ምስ ፑቲን ብኣካል ብምርኻብ ንዂናት ዩክሬን ክዛዝሞ ከም ዝኽእል ይምጉት። ክረምሊን ድማ ነዚ ሓሳብ’ዚ ብሓጎስ ተቐቢላቶ ኣላ።

ክልተ መራሕቲ ንምርኻብ ዝዀነ ቅድመ-ኩነት ከም ዘየድሊ’ያ ክረምሊን ትገልጽ።

ትራምፕ ኣብዚ ኲናት ዝጠፍአ ህይወት ኣዝዩ ብዙሕ ብምዃኑ ኣብ ሓጺር እዋን ክውዳእን ንሱ ድማ ብዘተ ጥራይ ክኸውን ከም ዝኽእል ደጋጊሙ ሓቢሩ ኣሎ።