ሱዳን - ብርቱዕ ዝናብ 17 ሰባት ቀቲሉ፡ ልዕሊ 11-ሽሕ ኣባይቲ ኣፍሪሱ

ኣብ ሰሜናዊ ክፋል ሱዳን ብዝሃረመ ብርቱዕ ዝናብ፡ 17 ሰባት ቀቲሉ ልዕሊ 11,500 ሽሕ ገዛውቱ ወሲዱ። ድሕሪ’ቲ ምዕናው ኣባይቲ ብውሑዱ 170 ከም ዝቖሰሉ’ውን ንሚኒስትሪ ትሕተ-ቅርጺ እታ ሃገር ብምጥቃስ ኣገልግሎት ዜና ፈረንሳይ ጸብጺቡ።

ኣብቲ ከባቢ ሓይሊ መብራህቲን ካልእ ኣገልግሎትን ስለ ዘየሎ ድማ በቲ ውሕጅ ዝተጸልዉ ወገናት ኣብ ሰጣሕ ጎልጎል ከም ዘለዉ ሰብ-መዚ ጥዕና ኣቡ-ሓማድ ንኣገልግሎት ዜና ፈረንሳይ ሓቢሮም።

ነፍሲ-ወከፍ ዓመት ኣብ ሱዳን ብዝሃርም ብርቱዕ ዝናብ ፈለግ ኒል መሊኡ፡ ኣብ ከባቢ ዝርከብ ትሕተ-ቅርጺ ከዕኑ ልሙድ ተርእዮ’ዩ። ሕጂ ሱዳን ድሕሪ ኲናት ዝፈጠሮ ምዕናው መሰረታዊ ኣገልግሎት ግን ግዳያት ንምሕጋዝ ኣዝዩ ከቢድ ምህላዉ ኣገልግሎት ዜና ፈረንሳይ ይጠቅስ።