ትምህርቲ ክልል ትግራይ ዳግም ንምጅማር፡ ጕጅለ ሚ/ትሪ ኢትዮጵያ ዑደት ይገብር ኣሎ

(መቐለ)ኣብ ክልል ትግራይ ትምህርቲ ኣብ ኣብያተ ትምህርትን ኣብቲ ክልል ኣብ ዝርከባ ዩኒቨርሲቲታት ንምጅማር፡ ሓደ ጕጅለ ሚኒስትሪ ትምህርቲ ኢትዮጵያ ኣብቲ ክልል ዑደት ስራሕ ሎሚ ጀሚሩ።

ብሚንስተር ዲኤታ ሚንስትሪ ትምህርቲ ዶክተር ሳሙኤል ክፍሌ ዝምራሕ ጉጅለ፡ ናይ ዩኒቨርሲቲታት ኣዲስኣበባ፡ ባህርዳር፡ ሰመራ፡ ጅግጅጋ፡ ደብረብርሃንን ጅማን ፕረዚደንታት’ውን ሓቚፉ ኣሎ።

ሎሚ ሓሙስ፡ እቲ ጕጅለ፡ ኣብ ዩኒቨርሲቲ መቐለን መሰናድኦ ቤት ትምህርቲ ሃፀይ ዮሃንስን ዝበፅሐ ዕንወትን፣ ማእከል ተመዛበልቲ ኮይኑ ዘሎ ቀዳማይ ብርኪ ቤት ትምህርቲ ዓዲ ሓውስን ዑደት ኣካዪዱ።

ኣብ ከተማ መቐለ ካብ ዘለዋ 45 መንግስታዊ ኣብይተ ትምህርቲ እተን 24 መዕቆቢ ተመዛበልቲ ኮይነን ከም ዘለዋ ኣብቲ ዑደት ተገሊፁ።

ኣብ ትግራይ ንዝሓለፉ ሰለስተ ዓመታት ትምህርቲ ተቛሪጹ’ዩ ጸኒሑ።