ሓይልታት ኣምሓራ ካብ ኣገዳሲት ከተማ ሽረን ከባቢኣን ከምዝወጹ ወተሃደራዊ ሓይሊ ኢትዮጵያ ኣፍሊጡ

ሓይልታት ኣምሓራ ካብ ኣገዳሲት ከተማ ሽረን ከባቢኣን ከምዝወጹ ወተሃደራዊ ሓይሊ ኢትዮጵያ ኣፍሊጡ።

እቶም ኣብ ጎኒ ምክልኻል ኮይኖም ኣንጻር ዕጡቓት ትግራይ ክዋግኡ ዝጸንሑ ዕጡቓት ኣምሓራ ካብ ክልል ትግራይ ዝወጹ ዘለዉ ብመሰረት`ቲ ዝተበጽሐ ስምምዕ ሰላም`ዩ።

ምኽትል ኣዛዚ ሰራዊት ምክልኻል ኢትዮጵያ ጀነራል ኣበባው ታደሰ ነቲ ምውጻእ ዕጡቓት ኣምሓራ ከምዝተዓዘቦ`ውን ተገሊጹ`ሎ።

ብዛዕባ`ዚ ካብ ሰበ-ስልጣን ትግራይ ዛጊት ዝተባህለ ነገር የለን። ብናጻ ወገን`ውን ምርግጋጽ ኣይተኻእለን። እንተተረጋጊጹ ግን ተወሳኺ ግስጋሰ ስምምዕ ሰላም ከምዝኸውን ይግለጽ ኣሎ።

ህወሓት ዝሓለፈ ረቡዕ ከቢድ ኣጽዋራቱ ንፈደራል መንግስቲ ከረክብ ጀሚሩ`ዩ። ኣንጻር ህወሓት ክዋግኡ ዝጸንሑ ወተሃደራት ኤርትራ`ውን ካብ ክልተ ከተማታት ምውጽኦም መሰኻኽር ሓቢሮም`ዮም። ካብ ምሉእ ትግራይ ይወጹ ብዛዕባ ምህላዎም ግን ንጹር ኣይኮነን- ይብል ጸብጻብ ማያ ሚስክር ካብ ኣዲስ ኣበባ።

ብኻልእ ወገን ትማሊ ኣብ ኣዲስ ምስ ሰበ-ስልጣን ኢትዮጵያ ዝተራኸባ ሚንስተራት ውጻኢ ፈረንሳን ጀርመንን፡ ነቶም ኣብቲ ኩናት ግፍዕታት ዝፈጸሙ ንምቕጻዕ ሓደ ናይ መሰጋገሪ ናይ ፍትሒ መካንዝም ክቐውም ጸዊዐን ኣለዋ።

" ንሕና ጀርመናውያንን ፈረንሳውያንን ካብ ተመክሮና ከም እንፈልጦ፡ ዕርቂ ኣብ ሓንቲ ረፍዲ ኣይመጽእን`ዩ፡ ግን ንግዳያት ገበናት ፍትሒ ከይሃብካ ዕርቅን ነባሪ ሰላምን ዘይሕሰብ`ዩ ኢላ-ሚስንተር ወጻኢ ጀርመን ኣናሊና ባወርቦክ።

ናይ ፈረንሳ መዘንኣ ካተሪን ኮሎና ድማ፡ ፈረንሳ ነቲ ውዕል ሰላም ብሓጎስ ከምዝተቐበለቶ ድሕሪ ምግላጻ፡ ተጻብኦታት ደው ኢሉ፡ ረድኤት ናብቲ ክልል ይኣቱ`ሎ ዕጡቓት ዕጥቆም ይፈትሑ ኣለዉ- እዚ ድማ ጽቡቕ ግስጋሰ`ዩ- ክትቅጽልዎ ድማ ነተባባዓኩም ኢላ።

ኣብቲ ዝነበረ ጋዜጣዊ መግለጺ ዝተዛረበ ሚንስተር ወጻኢ ኢትዮጵያ ደመቀ መኮነን ብወገኑ፡ ገበነኛታት ከይተቐጽዑ ከምዘይተርፉ ኣሰሚዑ`ሎ። ነዚ ንምግባር ድማ ትካላት ሰብኣዊ መሰላት ሕቡራት ሃገራትን ትካል ሰብኣዊ መሰል ኢትዮጵያን፡ መርመርቲ ገበናት ናብቲ ብኹናት ዝተሃስየ ከባብታት ክሰዱን ክምርምሩን ድማ ኢትዮጵያ ክትሓትት ከምዝጸንሐት ተዛሪቡ።