ጋዜጠኛ ተመስገን ደሳለኝ ካብ ቤት ማእሰርቲ ተፈቲሑ

ጋዜጠኛ ተመስገን ደሳለኝ ሎሚ ረቡዕ ሕዳር 16,2022 ካብ ቤት ማእሰርቲ ተፈቲሑ።

ላዕለዋይ ቤት ፍርዲ ኢትዮጵያ ጋዜጠኛ ተመስገን ደሳለኝ ብ30 ሽሕ ቅርሺ ዋሕስ ክፍታሕ ትማሊ ብዝሃቦ ውሳነ ሎሚ ረቡዕ ድሕሪ ቐትሪ ካብ ቤት ማእሰርቲ ቂሊንጦ ከምዝተፈትሐ ሓው እቲ ጋዜጠኛ ታሪኩ ደሳለኝ ንድምፂ ኣመሪካ ገሊፁ።

ጋዜጠኛ ተመስገን ደሳለኝ ንክፍታሕ ዝተወሰነ ትማሊ ሰሉስ እኳ እንተነበረ፣ ቤት ማእሰርቲ ቂሊንጦ ክፈትሖ ከምዘይከኣለ ጠበቕኡ ተዛሪቦም። ጠበቓ እቲ ጋዜጠኛ ቤተማርያም ኣለማየሁ ሎሚ ናብ ቤት ፍርዲ ከይዶም ነቲ ቤት ማእሰርቲ ካልኣይ ደብዳበ ክፀሓፈሉ ብምግባሮም ጋዜጠኛ ተመስገን ደሳለኝ ሎሚ ድሕሪ ቐትሪ ከምዝተፈትሐ ታሪኩ ደሳለኝ ኣረዲኡ።

ኣቐዲሙ ላዕለዋይ ቤት ፍርዲ ኢትዮጵያ ጋዜጠኛ ተመስገን ደሳለኝ ብ100 ሺሕ ቅርሺ ዋሕስ ክፍታሕ ወሲኑ እኳ እንተነበረ፣ ዓቃቢ ሕጊ ነቲ ውሳነ ብምቅዋም ንጠቕላሊ ቤት ፍርዲ ይግባይ ብምባሉ ንሽዱሽተ ኣዋርሕ ከይተፈትሐ ፀኒሑ እዩ።