ዋሽንግተን —
ኣብ ደቡብ ኣፍሪቃ “ገበርሃ” ኣብ ትበሃል ንእሽቶ ከተማ ኣብዚ ዝሓለፈ ቀዳመ ሰንበት ዕጡቓት ኣብ ጽንብል ልደት ናይ ሓደ ሰብ ተኣኻኺቦም ኣብ ልዕሊ ዝነበሩ ሰባት ተኹሲ ኸፊቶም ሸሞንተ ሰባት ቀቲሎም ካልኦት ሰለስተ ሰባት ኣቁሲሎም ክብል ፖሊስ’ታ ሃገር ሎሚ ሰኑይ ኣፍሊጡ።
በቲ ኣብታ ወደብ ኤልሳቤጥ ተባሂላ ትጽዋዕ ዝነበረት ደቡባዊት ናይ ወደብ ከተማ ዝተፈጸመ ናይ ኣልማማ ተኹሲ እቲ ልደቱ ዘኽብር ዝነበረ ሰብ ሓደ ካብቶም በቲ ተኹሲ ዝተጎድአ’ ዩ።
ወናኒ’ቲ ገዛ በዓል ልደቱ የኽብር ኣብ ዝነበረሉ እዋን ክልተ መንነቶም ዘይተፈልጡ ዕጡቓት ናብቲ ኣፍደገ’ቲ ገዛ ብምቕራብ ኣብ ልዕሊ’ቶም ኣጋይሽ ተኹሲ ከምዝኸፈቱ ፖሊስ ኣብ ዘውፅኦ መግለፂ ኣፍሉጡ’ሎ።
እቶም ዕጡቓት ብኣልማማ ነዚ ተኹሲ ንምኽፋት ዝደፋፎኦም ምኽንያት ገና ኣይተፈልጠን። ፖሊስ ነቲ ፍፃመ ይምርምሮ ከምዘሎ’ዉን ተገሊፁ’ሎ።
ደቡብ ኣፍሪቃ ሓንቲ ካብተን ኣብ ዓለም ዝለዓለ መጠን ቅትለት ዝፍፀመላ ሃገር’ያ።
