ኣስመራ —
ኣብ ኤርትራ ዝተረኣየ ለበዳ ኣንበጣ ምድረ-በዳ ዝኾነ ጉድኣት ከየውረደ ኣብ ትሕቲ ቁጽጽር ከምዝኣተወ ፈጻሚ ስራሕ ኮሚሽን ምቁጽጻር ኣንበጣ ማእከላይ ዞባ ዶ/ር ማሙን ኣል ኣላዊ ገሊጹ።
ዶ/ር ማሙን ነዚ ዝገለጸ፡ለበዳ ኣንበጣ ኣብ ዝተራእየሉ ቦታታት ዞባ ሰሜናዊ ቀይሕ ባሕሪ ድሕሪ ዝገበሮ ናይ ሰለስተ መዓልታት ኮለላን ትዕዝብትን’ዩ። ዶ/ር ማሙን እንትርፎ ሓሓሊፎም ኣብ ገለ ቦታታት ዝረኣዩ ፋሕ ዝበሉ ዘይነፍሩ ኣንበጣ፡ዘስግእ ኩነታት ከምዘይልቦ ተዛሪቡ።
ኣብ ዝተፈላለዩ ማዕከናት ናይ ዜና ዝፍነዉ ዝነበሩ ሓበሬታታት ብኣካል መጺኦም ክዕዘቡን ህጹጽ ረድኤት ዘድሊ እንተኾይኑ ስጉምትታት ንምውሳድ ዝከኣለሉ ኩነታት ንምፍጣርን ከምኡ’ውን ምስ ዝምልከቶም ሰበ-ስልጣን ኤርትራን ሓለፍቲ ሚኒስትሪ ሕርሽ ኤርትራ ንምዝርራብን ከምዝኾነ ዶ/ር ማሙን ኣል ኣላዊ ተዛሪቡ።
