ሚ/ጉ/ወ ኣመሪካ ንልዝብ ኣብ ጉዳይ ኲናት ሩስያን ዩክሬንን ናብ ስዑዲ ዓረብ ኣምሪሖም

ኲናት ሩስያን ዩክሬንን ደው ንምባል ብኣመሪካ ዝምራሕ ጻዕሪ ሓጎጽጎጽ ኣብ ዝርእየሉ ዘሎ እዋን፡ ኣብዚ ሰሙን`ዚ'ውን ኣብ መንጎ ዋሺንግተንን ኪየቭን ኣብ ስዑዲ ዓረብ ዝርርብ ክካየድ ተመዲቡ`ሎ።

ሚንስተር ጉዳያት ወጻኢ ኣመሪካ ማርኮ ሩብዮ ምስ ልኡኻት ዩክሬን ንምርኻብ ትማሊ ሰንበት ናብ ጅዳ ስዑዲያ ከይዶም ኣለው። ዕላማ'ዚ ርክብ ፕረዚደንት ትራምፕ ዝሓዞ ሸቶ ንምድቃስ ኲናት ሩስያን ዩክሬንን ንምዕዋት ከምዝኾነ ሰበ-ስልጣን ኣመሪካ ይገልጹ።

እዚ መገሻ ናብ ስዑዲ ዓረብ ዝስማዕ ዘሎ፡ድሕሪ`ቲ ኣብ ዋይት ሃዋስ ለካቲት 28 ዝነበሮም ወጥሪ ዝመልኦ ርክብ ፕረዚደንት ዩክሬን ናብ ፕረዚደንት ትራምፕ ሓደ ናይ መተዓረቒ ደብዳበ ድሕሪ ምልኣኹ`ዩ።