ሰነትን ባይቶ ወከልቲ ህዝቢ ኣመሪካን ብዛዕባ ምደባ ባጀት ክሳብ ሕጂ ኣይተሰማምዑን

ሰነትን ባይቶ ወከልቲ ህዝቢ ኣመሪካን ብዛዕባ ምደባ ባጀት ምስምማዕ ኣብ ዝሰኣንሉ እዋን መንግስቲ ዝዕጸወሉ ዕድል እናወሰኸ ይኸይድ ኣሎ። ንዝቕጽል 12 ኣዋርሕ፡ ብዛዕባ ምቕጻል ሓገዝ ንዩክሬን፡ ምቁጽጻር ኢሚግረሽን ኣብ ዶብ ኣመሪካን ሜክሲኮን፡ ከምኡ`ውን ብዛዕባ ፕሮግራም ማሕበራዊ ሓገዝ ንጽጉማት ኣመሪካውያን ዝምደብ ገንዘብ ከሰማምዖም ኣይክኣለን። በዚ መሰረት፡ ክሳብ ጽባሕ ቀዳም እንተዘይተሰማሚዖም፡ ካብ ሰንበት ጀሚሩ ኣብያተ ጽሕፈታት መንግስቲ ክዕጾ`ዩ ዝብል ትጽቢት ኣሎ።

ደሞክራት ዝዕብልልዎ ሰነት ክሳብ ወርሒ ሕዳር ከቐጽል ዝኽእል ባጀት የቕርቡ`ለዉ።

ሪፓብሊካን ኣፈጉባኤ ባይቶ ዝኾነ ከቨን መከርቲ ምስ ውሑዳት ብጾቱ ግን ነቲ ሓሳብ ድሮ ነጺጎሞ`ዮም።

ኣብ ክንድኡ ንዓመት ዝሰርሕ ንዝበልዎ እማመ ምደባ ባጀት ድምጺ ሂቦምሉ ኣለዉ፡ እንተኾነ ንምዕጻው ትካላት መንግስቲ ዘድሕን ኣይመስልን።

ትካላት መንግስቲ ኣመሪካ ካብ ትማሊ ጀሚረን ንሰራሕተኛታተን መንግስቲ ክዕጾ ከም ዝኽእል ኣፍሊጠን ኣለዋ። እንተኾነ ትካላት መንግስቲ ይትዓጾ`ምበር እቲ ብልዑል ኣገዳስነት ዝምደብ ስራሕ መንግስቲ ግን ካብ ስራሕ ደው ኣይብልን`ዩ።