እዚ ከምዚ’ሉ ከሎ ምምሕዳር’ታ ሃገር ንመጀመርያ ጊዜ ኣብ ከምዚ ዓይነት መጥቓዕቲ ቁጽሪ ዝሞቱ ወግዓዊ ክገብር ይዳለው ኣሎ። እቲ ንነዊሕ እዋን ብምስጥራዊነት ክስራሕ ዝጸንሐ ፕሮግራም ግልጹነት ክህልዎ ብዙሕ ትጽቢት ተነቢሩ’ሎ።
ጉጅለታት ተሓለቕቲ ሰብኣዊ መሰላት ካብ ነዊሕ ጀሚሮም ኣብዚ ኣንጻር ግብረ-ሽበራ ዝዓለመ መጥቓዕትታት ቁጽሪ ዝሞቱ ብወግዒ ክግለጽ ክጽውዑ እንተጸንሑ’ካ ምምሕዳር ኣሜሪካ ግን ቁጽሪ ምውታት ንምግላጽ ኮነ ንምርግጋጽ ፍቃደኛ አይነበረን ።
ካብ ትካል ተሓለቕቲ ሰብኣዊ መሰላት ሂማን ራይትስ ፈርስት ሪታ ሲሞን ብዛዕባ’ቲ ኩነታት ከምዚ ይብላ።
‘ኣብዚ ጉዳይ ልዑል ዝኾነ መዓቀኒታት’ዩ ዘለና ስለዚ እመኑና። ዝኸአለና ኩሉ ንገብር ኣለና ማለት ጥራይ እኩል ኣይኮነን ። ስለዚ ዝሓሸ ሓበሬታ ብወግዒ ምግላጽ ይግብኦም’ዩ።’
ምምሕዳር ፕረዝደንት ኦባማ ብወገኑ ኣብ ቀረባ እዋን ወግዓዊ ኣብ ዝኸውን ሪፖርት ካብ 2009 ዓ.ም ጀሚሩ ብዘይካ ከም ኣብ ዒራቕ፡ ኣፍጋኒስታንን ሶርያን ዝበለ ተጻባኢ ከባቢታት ወጻኢ ብመጥቓዕትታት ሰብ-ኣልቦ ነፈርቲ ኣሜሪካ ቁጽሪ ዝሞቱ ተዋጋእትን ሰላማዊ ሰባት ከምዝገልጽ ሓቢሩ’ሎ።
ወሃቢ ቃል ዋይት ሃውስ ጆን ኤርነስት ብወገኖም ብዛዕባ’ቲ ወግዓዊ ዝኸውን ሪፖርት ከምዚ ይብሉ።
‘ይፍጸም ከምዝነበረ’ኳ ብወግዒ ኣፍልጦ ንህብ ኣይነበርናን። ሕጂ እቲ ዝኸናወን ነገራት ብስሩዕ ወግዓዊ ምግባርናን ቁጽሪን ንጽልዋ’ዞም ስርሒታትን ውጺኢቶምን ምግላጽና ብጭቡጥ ናብ ግሉጽነት ንስጉም ምህላውና ዝርኢ’ዩ። ’
ካብ ትካል ሁማን ራይስትስ ፈርስት ዝኾና ሚስ ሲሞኒ ግን ቁጽሪ ጉዱኣት ጥራይ ምግላጽ እኹል ከምዘይኾነ እቲ ምምሕዳር ክንደይ ተዋጋእቲ ፡ ክውን ስግኣት፡ ተክእሎ ኣብ ትሕቲ ቁጽጽር ክኣትው ዝክእሉን ፖሊሲ ዝቅጽል መጥቃዕትታት ሰብ-ኣልቦ ነፈርቲ ዘሎ ምስጥራውነት ዝኣመስሉ’ውን ኣብቲ ሪፖርት ክጠቓለሉ ኣለዎም ይብላ።
ብተወሳኺ ‘ኣብ ዝሓለፈ ዓመታት ኩሉ’ቲ ምምሕዳር ዝቐመጦ መዓቀኒ ፡ ገደብ ኣብ ጽሑፍ ክሰፍር አለዎ ምኽንያቱ ፕረዝደንት ኦባማ ካብ መዝነቶም ኣብ ዝሓድግሉ እዋን መወዳእታ ዘይብሉ ኩናት ሓዲጎም ንከይኸዱ’ዩ’ ኢለን።
ተንተንቲ ብወገኖም ኣብ መጻኢ ብድሆታት ክህልዉ’ዮም እዚ መጥቓዕትታት ሰብ-ኣልቦ ነፈርቲ ኣሜሪካ’ውን ኣካል ፖሊሲ ጸረ-ሽብራ ኣሜሪካ ኮይኑ ክቅጽል’ዩ ይብሉ።
ምሉእ ትሕዝቶ ኣብዚ ምስማዕ ይክኣል።
