ካብ ዝተፈላለያ ክፍላተ ግዝኣታት ዩናይትድ ስቴትስ ናብ ዋሽንግተን ዲሲ ዝዋሓዙ ተጋሩን ደገፍቶም ኤርትራዊያንን ሱዳናዊያንን ሎሚ ሓሙስ ኣብ በሪ ሚኒስትር ወጻኢ ኣሜሪካ መቀጸልታ ክገብርዎ ዝቀነዩ ሰልፊ ኣካይዶም።
እቶም ተጋሩ ሎሚ ዝነበሮም ሰልፊ ብመንጽር ድጋፍ ካብ’ቶም ዝሓለፉ ሰልፊታት ብበዝሒ ህዝቢ ዘሳተፈ ነይሩ። ካብ ኮሚቴ ምውህሃድ ናይ ተቃውሞ ሰልፊታት ተጋሩ ሓደ ዝኾነ ኣቶ የማነ ሓለፎም ‘መንግስቲ ኣሜሪካ ዛጊድ መልሲ ክህበና ጀሚሩ ኣሎ፣ ኣብ ትግራይ ዘሎ ኩነታት’ውን ተረዲእዎ፣ ንመፍትሒኡ’ውን ምስ መሻርኽቱ ወገናት ኮይኑ ይሰርሕ ከምዘሎ ኣፍሊጡና እዩ፣ ስለዚ ጻዕሪና ውጽኢታዊ ይኾን ኣሎ’ ክብል ገሊጽዎ።
እቶም ተሰለልፍቲ ‘ስራዊት ኤርትራ ካብ ትግራይ ይውጻእ፣ ዕጡቃት ክልል ኣምሓራ ካብ ትግራይ ይውጽኡ’ ዝብሉን ካልኦት ጭርሖታትን የቃልሑ ነይሮም።
