ኣንጻር ወታሃደራዊ ዕልዋ ዝዓለሙ ሓደሽቲ ተቓውሞታት ኣብ ከተማታት ሱዳን ተኻይዶም

ብኣሽሓት ዝቑጸሩ ሱዳናዊያን ነቲ ነታ ሃገር ናብ ፖለቲካዊ ህውከትን ዝእተወን ንቁጠባዊ ጸገማት ዘጋደደን ኣብ ዝሓለፈ ጥቅምቲ ዝተኻየደ ወታሃደራዊ ዕልዋ መንግስቲ ብምቅዋም ሓድሽ ናይ ተቃውሞ ሰልፍታት ኣብ ዋና ከተማ ካርቱምን ካልኦት ከተማታት'ታ ሃገርን የካይዱ።

እዚ ኣብ ልዕሊ እቶም ገዛእቲ ጀነራላት ተጽዕኖ ንምፍጣር ዝግበር ዳሕረዋይ ጻዕሪ እዩ።

እቲ ምሓዝ ስልጣን እቶም ጀነራላት ዳርጋ መዓልታዊ ሲቪላዊ ምምሕዳር ዝጠልብ ኣብ ጽርግያታት ተቃውሞ ሰልፍታት ክካየድ ኣለዓዒሉ'ዩ።

እቲ ትማሊ ረቡዕ ኣብ ዋና ከተማ ካርቱም:ኡምዱርማን: ፖርት ሱዳን: ዳርፉርን ካልኦት ከተማታት'ታ ሃገርን ዝተኻየደ ተቓውሞ ኣብ ዝኽሪ ሰለስተ ዓመት ንናይ ነዊሕ ዓመት መራሒ'ታ ሃገር ዝነበሩ ፕረዚደንት ዑመር ኣልበሽር ካብ መዝነቶም ዘውረደ ተቓውሞ:ብርቱዕ ሙቐት ዘለዎ ኩነታት ኣየርን ጾመ- ረመዳንን'ዩ ተኻይዱ።