ደቡብ ኮርያ ሃገራት ኣፍሪቃ ኣብ ምህርቲ ሩዝ ዘለወን ጽግዕተኝነት ንምጉዳል ከምትሕግዝ ተፍልጥ

ደቡብ ኮሪያ ናይ ሩዝ ምህርተን ንምድንፋዕን ካብ ወፃኢ ሃገራት ዘእትውኦ መጠን ሩዝ ንምጉዳል ምስ ሸሞንተ ሃገራት ኣፍሪቃ ኣብ ዝቕፅል ሰሙን ኣብ ስምምዕ ንምብጻሕ ተዳልያ ምህላዋ ሚንስተር ሕርሻ'ታ ሃገር ቹንግ ህዋንግ-ከውን ንኣገልግሎት ዜና ሮይተርስ ገሊፆም።

እዚ ዝኸውን ዘሎ ፕረዚደንት ዩን ሱክ ይኦል ፖሊስ ወጻኢ ጉዳያት'ታ ሃገር ንምምሕያሽን ኣብ መላእ ዓለም ዝያዳ ንጡፍ ግደ ዘለዋ "ዓለምለኻዊ ወሳኒት ሃገር" ንምግባርን ቃል ኣብ ዝኣተውሉ እዋን እዩ።

ሚንስተር ቹንግ ኣብዚ ሰሙን ኣብ ዝሃብዎ ቃለ ምልልስ"K-Ricebelt Project’’ ኣብ ትሕቲ ዝብል ፕሮጀክት ደቡብ ኮሪያ ኣብ ጋና፣ ጊኒ፣ ጊኒ ቢሳው፣ ጋምቢያ፣ ሰኔጋል፣ ካሜሮን፣ ኡጋንዳን ኬንያን ምስ ከባቢያዊ ኩነታት ዝጠዓዓምን ኣብ ውሽጢ እተን ሃገራት ካብ ዝፈርይ ብክልተ ሰለስተ ኢድ ዝበለፀ ንምፍራይ ዘኽእሉ መሳለጥያታት ክትሃንጽ እያ ኢሎም።

ንሶም ወሲኾም ብዙሕ ግዜ ኣብ ኣፍሪቃ ኣብ ዝበፅሕሉ ግዜ ሰበስልጣን ዓብይ ድልየት ከምዘለዎም ገሊፆምለይ እዮም ኢሎም።

ሩዝ ኣብ ምዕራብ ኣፍሪቃ ቀንዲ መግቢ እዩ። ናይ ውሽጢ ሃገር ምህርቲ ግን ን60 ሚእትዊት ድልየት ጥራሕ እዩ ዘማልእ።

እቶም ሚንስተር ሕርሻ ደቡብ ኮሪያ ኣብ ዝቕፅል ኣርባዕተ ዓመታት ልዕሊ 100 ቢሊዮን ዎን ወይ 77 ሚሊዮን ዶላር ኣብ ናይ መግቢ ፕሮጀክት ንምምዋል ሃገሮም ምውጣና'ውን ሓቢሮም ኣለው።

ሚንስተራት እተን ሸሞንተ ሃገራት ኣፍሪቃ ዝቕፅል ሰኑይ ነቲ ስምምዕ ንምፍራም ናብ ደቡብ ኮርያ ክገሹ እዮም።